Geagte pres. Zuma...
2010-02-15 07:43
Cobus Coetzee
Johannesburg - Planne word beraam om pres. Jacob Zuma vandeesweek te pak oor sy regering se gebrekkige planne om misdaad te bekamp.
Dít kom nadat hy Donderdag in sy staatsrede, sy belangrikste toespraak nóg as president, versuim het om konkrete planne bekend te maak om Suid-Afrika se grootste probleem, naamlik misdaad, te bekamp.
Slegs 2% of 120 woorde van sy toespraak van sowat ’n uur is afgestaan aan hoe sy regering misdaad vanjaar sal hokslaan.
Volgens die polisie se misdaadstatistieke maak kontakmisdaad 32,7% van alle misdaad uit.
Altesame 18 148 mense is in die jaar tot einde Maart 2009 vermoor, al het die totale getal moorde met 1,8% afgeneem.
Huisrooftogte het met meer as 27% toegeneem.
Opposisiepartye het Sondag op die vooraand van die debat oor die staatsrede in die parlement uit een mond gepraat oor hul teleurstelling omdat Zuma geen konkrete planne vir misdaadbekamping voorgelê het nie.
’n Verwagte 10 000 protesbriewe oor misdaad sal Dinsdag, kort voor Zuma se repliek op die debat, op die voorstoep van die parlement afgelaai word.
Dirk Hermann, adjunkhoof van Solidariteit, het Sondag gesê ’n veldtog is Vrydag van stapel gestuur om Suid-Afrikaners sover te kry om e-pos aan Zuma te stuur en die erns van misdaad in die land aan hom te benadruk.
Die e-posse sal uitgedruk en by die parlement afgelewer word.
Teen Sondagmiddag is meer as 1 400 briewe reeds gestuur.
“Die wittebrood is oor en die president gaan aangevat word oor hoekom hy net so ligtelik aan dié groot probleem geraak het,” het Dianne Kohler Barnard, DA-LP, gewaarsku. “Suid-Afrikaners is moeg vir sy manewales in sy persoonlike lewe, hulle soek duidelike oogmerke.”
Pieter Groenewald, VF+-LP, meen Zuma se uitsprake is niks nuuts nie en die uitbreiding van die polisiediens is reeds deel van die mediumtermynplan.
“Die standaard van die polisiëring moet eerder verbeter word.”
Prof. Susan Booysen, politieke ontleder van die Universiteit van die Witwatersrand, meen Zuma het in ’n kort tyd twee terugslae ervaar – toe die nuus oor sy 20ste kind gebreek het en sy staatsrede.
“Sy steunvlak onder Suid-Afrikaners het waarskynlik die afgelope week met 5% gedaal. Die regering sal dié week ernstige skadebeheer moet toepas. Zuma moes sy kop op ’n blok gesit en duidelike oogmerke aangekondig het.”
Vincent Magwenya, Zuma se woordvoerder, wou gister weet wat meer die president dan kon sê.
“Misdaadbekamping is een van die top-vyf prioriteite van die regering. Zuma kan nie elke jaar ’n nuwe misdaadbekampingsplan aankondig nie; mense gaan sê hy is inkonsekwent.
“Net omdat hy iets nie in sy staatsrede genoem het nie, beteken dit nie die regering gee nie aandag daaraan nie.”
- Die Burger