“Gays en lesbiërs moet aanvaar word” - CGE
2009-09-25 12:07
Johannesburg- “Die vermoorde lesbiese sokkerspeler, Eudy Simelane, het die reg gehad om haarself te wees en haar seksuele oriëntasie moes nie die rede vir haar wrede dood gewees het nie,” het die Kommissie vir Geslagsgelykheid (CGE) Vrydag gesê.
“Simelane se dood moet as ‘n les dien vir die wat ander klassifiseer op grond van hulle geslag. Mense moet begin om mekaar te aanvaar in die samelewing,” het die CGE in ‘n verklaring gesê.
Dit kom nadat Simelane se moordenaar Dinsdag lewenslange tronkstraf ontvang het vir die moord op dié voormalige Banyana Banyana-sokkerspeler.
Die hof in Delmas het die man lewenslank gevonnis vir die moord op Simelane, 20 jaar omdat hy ‘n medepligtige was in die verkragting en ‘n verdere 15 jaar vir roof.
Simelane is verlede jaar deur ‘n groep mans aangeval en verkrag. Haar liggaam is later in veld in KwaThema gevind.
Twee ander mans is vrygespreek vir die aanval op Simelane. ‘n Vierde verdagte is reeds in Februarie tot 32 jaar tronkstraf gevonnis nadat hy skuldig gepleit het op al die aanklagtes. Hy het later erken dat die ander mans elkeen ook ‘n rol in die voorval gespeel het.
Simelane, wat vir Banyana Banyana uitgedraf het, se seksualiteit is oorspronklik nie as ‘n motief vir die moord oorweeg nie, maar aktiviste-groepe was van mening dat dié jong sokkerster juis geteiken is as gevolg van haar seksualiteit.
Volgens Emily Craven, van die Joint Working Group-aktiviste-groep, het hulle gehoop dat al vier mans ‘n straf ontvang het, maar is hulle verlig dat die hofsaak tot ‘n einde gekom het.
Die CGE het ook gesê dat aanvalle teen lesbiërs en gays hulle beroof van hulle menslikheid en hulle menseregte.
–Sapa