Gauteng trap rem oor e-skyfies vir tolpad
2012-01-13 14:45
Johannesburg – Die beplande implementering van die elektroniese skyfies (e-skyfies) vir Gauteng se nuwe tolhoofweë in Februarie, is uitgestel, het die Suid-Afrikaanse Nasionale Padagentskap (Sanral) gesê.
Tembakazi Mnyaka, voorsitter van die raad, het Vrydag in ‘n verklaring gesê die raad sal die publiek se kwessies aanspreek en na petisies kyk wat aan Sibusiso Ndebele, minister van vervoer, gestuur is.
Die Sanral-raad het Donderdag met Ndebele in Pretoria vergader om die padagentskap se mandaat, Gauteng se e-skyfies vir tolpaaie en toekomstige padprogramme te bespreek.
Voordat die e-tolskyfies aanvang neem, sal Sanral sy bevindinge aan Ndebele voorstel. Die minister sal dan aan die kabinet rapporteer.
Die omstrede stelsel sou in Februarie geïmplementeer word, maar het grootskaalse kritiek uitgelok.
Die betreklik lae registrasiekoers van e-skyfies vir Gauteng se nuwe tolhoofweë is ’n aanduiding dat motoriste dit boikot om hul misnoeë met die tolstelsel te kenne te gee, meen die DA.
Sanral het vandeesweek gesê 212 906 rekeninge is teen Dinsdag geregistreer, het Beeld Vrydag berig.
Die padagentskap het vroeër gesê sowat 2 miljoen skyfies behoort teen Februarie geregistreer te wees.
Volg Nuus24 op Twitter
- SAPA