Gastehuis-eienaars in huis vermoor
2009-10-29 16:39
Sabie - Die polisie is op die spoor van twee verdagtes wat 'n bekende Laeveldse paartjie in hul huis met 'n haelgeweer doodgeskiet het.
Dié paartjie, wie se restaurant bekend is vir sy tuisgemaakte pasta, is Donderdagoggend in hul huis by die Hendriksdal-treinstasie naby Sabie vermoor.
"Die polisie het 'n reusesoektog van stapel gestuur na die twee verdagtes wat die paartjie aangeval en toe geskiet het. 'n Dubbele moordsaak en rooftog word ondersoek," het supt. Abie Khoabane, provinsiale woordvoerder van die polisie, gesê.
Hy het gesê die paartjie is met 'n haelgeweer in hul huis langs hul restaurant doodgeskiet.
"Ons probeer nog vasstel of enigiets gesteel is en ons hoop om binnekort verdagtes vas te trek," het hy gesê.
Die paartjie se name kan nie bekendgemaak word nie, omdat hul naasbestaandes nog nie in kennis gestel is nie.
Hulle het die voormalige stasiemeester se huis in 'n gastehuis omskep en het 'n restaurant op dieselfde perseel besit.
'n Buurman, wat anoniem wou bly, het gesê sy huishulp en nóg 'n buurman het omstreeks 07:00 vyf skote gehoor.
Toe hulle ondersoek gaan instel, het hulle die vermoorde paartjie in hul nagklere in die huis gevind.
"Die rowers het by die agterdeur uitgehardloop. Die huis is geplunder," het die buurman gesê.
– African Eye