Gaste val man erg aan toe hy kla oor geraas
2012-01-03 10:48
Welkom. – ’n Prokureur het die naweek in die hospitaal deurgebring nadat hy vroegoggend by sy vrou se gastehuis in dié stad deur twee gaste aangeval is.
Brendan Kretzmann moes tientalle inwendige en uitwendige steke aan sy kop kry nadat sy regteroor met ’n gebreekte wynglas afgekap is.
Die oor het net aan ’n velletjie gehang en sy slaap is tot op die been oopgekerf.
Kretzmann sê hy was Vrydag by ’n muurbalklub toe twee mans van Botswana daar aangekom het om blyplek vir die naweek te soek.
Die eenhede daar was gesluit en Kretzmann het hulle na sy vrou se gastehuis by hul huis verwys.
By sy tuiskoms was die mans inbespreek en het al vertrek na die geselligheid waarvoor hulle na Welkom gekom het.
Skuins voor middernag het die mans met drie vreemde vroue teruggekom. Hulle het geraas en Kretzmann is teen 02:30 uit om hulle stil te maak.
’n Woordewisseling het gevolg, waarna Kretzmann deur die mans met ’n wynglas en drankbottel aangeval is.
Die mans en twee van vroue (die derde het weggehardloop) het daarna weggejaag.
Terwyl Kretzmann se vrou, Erika, met hom na die hospitaal is, het sy ma die polisie gebel.
Die mans en vroue het toe juis by die polisiekantoor gesit om ’n klag teen Kretzmann in te dien omdat hy hulle uit die gastehuis gesit het.
Hulle is daar in hegtenis geneem.
Kapt. Stephen Thakeng, polisiewoordvoerder, sê ’n klag van poging tot moord word ondersoek.
Die twee mans, onderskeidelik 34 en 43 jaar oud, is Saterdag op borgtog van R3 000 elk vrygelaat en moet vandag in die hof verskyn.
- Beeld