Gaddafi skiet met SA arsenaal
2011-06-19 10:33
Johannesburg – Hier is dit – die bewyse dat Suid-Afrikaanse skerpskuttergewere deur die veiligheidsmagte van die Libiese diktator, kol. Moeammar Gaddafi, teen sy eie mense gebruik word.
Die Suid-Afrikaanse regering weier steeds volstrek om te bevestig dat sowat 120 hoogs gesofistikeerde skerpskuttergewere van Truvelo Manufacturers in Midrand aan Libië verkoop is.
Maar in ’n video wat deur Rapport bekom is, word dié wapens deur Libiese rebelle vertoon nadat dit tydens gevegte in die stad Misrata van regeringsmagte afgeneem is.
Sowat 15 000 mense het reeds gesterf in die Libiese burgeroorlog wat vier maande gelede uitgebreek het nadat Ghaddafi betogings ten gunste van demokrasie met geweld onderdruk het. Volgens internasionale nuusberigte is burgerlikes met skerpskuttergewere doodgeskiet tydens betogings en begrafnisse.
En me. Marixie Mercado, woordvoerder van die Verenigde Nasies se agentskap vir kinders, het gesê volgens betroubare inligting word vroue en kinders gereeld deur Ghaddafi se skerpskutters as teikens uitgesonder.
Suid-Afrika se openbare beskermer, adv. Thuli Madonsela, oorweeg ’n DA-versoek om die land se wapenverkope van R68,9 miljoen aan Libië in Oktober 2010 te ondersoek.
Suid-Afrika se komitee oor beheer oor konvensionele wapens (NCACC) het oplaas bevestig wapentuig is aan Ghaddafi verkoop, maar weier om te sê of die skerpskuttergewere en tot 70 000 patrone daarby ingesluit was.
Benewens videogrepe waarin Libiese rebelle die Truvelo-gewere omhoog hou, is ’n soortgelyke wapen te sien in ’n Al Jazeera-nuusverslag van 29 Mei vanjaar.
Tom Wolmarans, ’n oud-polisieman wat vir die internasionale straftribunaal in Den Haag gewerk het, het aan Rapport gesê die wapens in die video’s het “sewe of agt hoogs unieke kenmerke” wat eie is aan die Truvelo. Ander wapen- en forensiese kenners het saamgestem.
In Februarie vanjaar het Lindiwe Sisulu, minister van verdediging en NCACC-lid, ontken dat sy iets weet van die verkoop van die skerpskuttergewere aan Ghaddafi se regime. Jeff Radebe, NCACC-voorsitter, het later erken dat “Kategorie A-wapens” (konvensionele wapens wat menseverliese kan veroorsaak) na Libië uitgevoer is. Hy het egter gesê ten tyde van die transaksie “was daar geen getuienis… dat daar enige politieke onrus in die land sou wees nie”.
Suid-Afrikaanse wetgewing oor konvensionele wapenverkope bepaal dat handel ontoelaatbaar is met lande wat aan “onderdrukking, aggressie of terrorisme” skuldig is.
Radebe het bygevoeg daar is geen bewyse dat sterftes in Libië deur Suid-Afrikaanse wapens veroorsaak word nie.
’n Direkteur van Truvelo, Ralf Gebert, het ook geweier om oor die maatskappy se Libiese saketransaksies te praat. “Daar is prosedures in Suid-Afrika wat ons volg.
“Ons hou by die reëls en regulasies en dis dit. Ons is nie bereid om te sê ja of nee nie,” het hy die afgelope week gesê.
Maar in ’n vroeëre onderhoud – toe hy gevra is of dit eties is om wapens aan diktators te verkoop – het Gebert gesê: “Jy bestuur ’n motor, reg? Laat jy uitlaatgasse uit jou voertuig? Jy maak mense dood, jy maak die omgewing dood.
“Wie gaan jy daarvoor blameer – Mercedes of BMW? Hoe sal dit jou laat voel? Gaan jy ophou om daardie kar te ry?”
Volg Nuus24 op Twitter
- Rapport