Gaddafi se dood 'ongemaklik' – Zuma
2011-11-01 14:15
Kaapstad – Die teregstelling van die uitgesette Libiese leier Muammar Gaddafi skep 'n ongemaklike gevoel oor die situasie in daardie land, het pres. Jacob Zuma gesê.
Zuma het op 'n sake-ontbyt in Kaapstad gesê dit sou beter wees vir Libiërs as Gaddafi in hegtenis geneem is en verhoor sou word sodat antwoorde verkry kon word oor hoe hy die land 41 jaar lank bestuur het.
"In die wêreld van menseregte is daar vandag howe om diegene wat sekere misdade pleeg, te veroordeel," het Zuma gesê.
"Diegene wat hom gesoek het, was veronderstel om hom in hegtenis te neem. Ongelukkig is hy doodgemaak."
"Dit het 'n ongemaklike gevoel oor die situasie in Libië geskep."
Zuma het gesê hy hoop Libië se Nasionale Oorgangsraad sal die land "regruk".
Gaddafi het op 'n spesifieke manier reageer op die opstande in Libië wat die situasie op hom gebring het.
"Selfs toe die situasie slegter en slegter geraak het, het hy gedink hy kan steeds sy stelsel verdedig," het Zuma gesê.
– Volg Nuus24 op Twitter
- SAPA