Fred ís kwaadwillig vervolg
2011-08-16 07:02
Kaapstad – ’n Voormalige polisiekaptein se oneerlikheid in die getuiebank ná die moord op Inge Lotz het die staat se saak ’n gevoelige knou toegedien.
Regter Anton Veldhuizen het Maandag sonder om doekies om te draai gesê Bruce Bartholomew was nie ’n eerlike getuie nie. “Hierdie getuie se mening is in alle opsigte nie die papier werd waarop dit geskryf is nie.”
Meer as ses jaar ná die moord op Lotz het haar eertydse kêrel, Fred Van der Vyver (28), bewys dat die polisie hom wel kwaadwillig weens haar moord vervolg het.
Bartholomew het getuig dat Van der Vyver met Lotz se moord verbind kan word deur ’n skoenafdruk in haar badkamer.
Familie en vriende van Van der Vyver het Maandag saggies in die Wes-Kaapse hooggeregshof begin hande klap kort nadat Veldhuizen beslis het dat Van der Vyver se eis teen die minister van polisie geslaag het.
Van der Vyver dagvaar die minister vir sowat R46 miljoen, omdat hy beweer dat hy kwaadwillig deur die polisie vervolg is.
Veldhuizen het gister slegs oor die meriete van die saak beslis. Hy het ook bevind dat die polisie verantwoordelik is vir die skade wat uit Van der Vyver se vervolging gespruit het.
Die partye sal in ’n latere stadium – waarskynlik volgende jaar – na die hof moet terugkeer om te beslis op hoeveel geld Van der Vyver geregtig is.
Hy is in November 2007 deur regter Deon van Zyl vrygespreek van Lotz se moord. Haar lyk is op 16 Maart 2005 in haar woonstel in Klein Welgevonden, Stellenbosch, gevind.
Van der Vyver het ná Maandag se uitspraak gesê hy is dankbaar teenoor sy regspan. Hy wou nie verder kommentaar lewer nie en het navrae na sy regspan verwys.
Sy pa, Louis, het gesê hulle is opgewonde oor die uitspraak. “Ons het nie iets anders verwag nie. Dit is ’n hoofstuk wat ons nou kan afsluit.”
Adv. Dup de Bruyn, SC, en Gary Pienaar, SC, vir Van der Vyver, het gesê hulle is in ekstase oor die uitspraak. “Ons is ongelooflik dankbaar dat daar ná ses jaar se baklei in ons guns beslis is.”
Adv. Kosie Olivier, SC, vir die staat, het gesê hulle gaan die uitspraak bestudeer voordat hulle enige besluit oor appèl neem.
Volg Nuus24 op Twitter.
- Volksblad