Fratsongeluk eis jong brandbestryder
2011-03-21 08:59
Stellenbosch - ’n Brandweerman is in die Overstrandgebied dood nadat ’n brandweerwa waaronder hy gelê en slaap het, oor hom gery het.
Ao. Martin Mostert, woordvoerder van die Kleinmond-polisie, het gesê Harold Jacobs (20) van PS Litholestraat 16, Kleinmond, is gisteroggend omstreeks 06:30 in die fratsongeluk dood.
Jacobs het na bewering voor die voorwiel van die voertuig gelê en slaap. Die span wat deurnag aan diens was, het gerus.
Die bestuurder het die brandweervoertuig aangeskakel en weggetrek met twee passasiers in die kajuit en een persoon wat agterop geklim het.
“Hy het gevoel hy ry oor iets en hy het onmiddellik gestop.
“Toe kry hulle die brandbestryder onder die voertuig,” volgens Mostert.
Jacobs was permanent in die diens van die Overstrand-munisipaliteit as ’n brandweerman.
Mostert het gesê die munisipaliteit het onmiddellik berading beskikbaar gestel aan al die betrokke noodwerkers.
’n Dossier van strafbare manslag is aangelê. Die bestuurder, ook ’n brandweerman, se naam kan nie bekend gemaak word voordat hy na verwagting Dinsdag in die Caledon-landdroshof verskyn het nie.
Hy is volgens Mostert erg getraumatiseer.
Mnr. Anton Bredell, minister van plaaslike regering, omgewingsbewaring en ontwikkelingsbeplanning, wat die gebied Saterdag besoek het, het gister sy medelye oorgedra aan die gesin en naasbestaandes van die brandweerman wat in die ongeluk gesterf het.
)Die vier lede van Werk met Water wat sedert Donderdagmiddag in die brandeenheid van die Tygerberg-hospitaal behandel word, is almal in ’n bevredigende en stabiele toestand. Al vier is steeds in die intensiewe-sorgeenheid van die brandwondafdeling. Volgens me. Laeticia Pienaar, hospitaalwoordvoerder, het die vier pasiënte die ergste wonde aan hul arms, hande, bene en gesigte opgedoen.
Mnr. Rodrick October (48) van Grabouw het derdegraadse brandwonde opgedoen, terwyl sy seun, Ruan October (25), en nog twee ander mans, onderskeidelik 42 en 48 jaar oud, minder ernstige brandwonde opgedoen het.
Die mans was volgens me. Adel Supra, waarnemende brandweerhoof van die Overberg-distriksmunisipaliteit, Donderdag omstreeks 16:00 op die plaas Monteiph aan Houwhoek se kant van Grabouw vasgekeer deur die brand. Hulle was besig met skoonmaakwerk op die berg toe hulle deur die vlamme oorval is.
- Volg Nuus24 op Twitter.
- Die Burger