Fortuin se politiek pla rugbyunie
2011-01-22 11:00
Die Burger
George - ’n Storm het losgebars oor die besluit van Bevin Fortuin, voormalige Springbok- en SWD-Arende-rugbyspeler, om die politiek te betree.
Die SWD-rugbyunie het hom Vrydag (gister) van Fortuin se besluit gedistansieer.
Fortuin het Woensdag aangekondig dat hy by die DA aansluit en later vanjaar as kandidaat in die munisipale verkiesing beskikbaar is.
'n Verklaring deur Hennie Baartman, president van die unie, lui onder meer dat die unie kennis geneem het van Fortuin se besluit. “Die unie is ’n apolitiese organisasie wat geen politieke party aanhang nie. Hy beywer hom vir die daarstelling van ’n verenigde rugbyunie.”
SWD-rugby erken elke persoon se reg tot vrye assosiasie, maar in die konteks van die bou van ’n verenigde unie kan hy hom nie met Fortuin se optrede vereenselwig nie.
Volgens Baartman is Fortuin nie ’n werknemer van die unie nie en dus nie meer kaptein van die SWD-Arende nie.
Baartman het gesê hy het baie hoë agting vir Fortuin en glo hy sal ’n aanwins vir die politiek wees. “Die unie bedryf rugby en nie politiek nie. Ons spelers is deel van ’n beroepsopset. Ons is nie ’n semi-professionele bedryf waar mense ander beroepe kan beoefen nie.”
Volgens Baartman het die unie onlangs nuwe kontrakte aan Fortuin en ander aangebied. Die spertyd vir die antwoorde daarop was Woensdagmiddag. Fortuin het nie gereageer nie.
Die unie se bestuur vergader vandag en daar sal besin word of kontrakte weer aan Fortuin en die ander spelers gebied sal word. ’n Verbaasde Fortuin het gesê hy vind die tydsberekening van die verklaring vreemd en bygevoeg die Grondwet skryf nie voor met wie iemand mag assosieer nie. “Ek mag stem vir wie ek wil.”
- Die Burger