Forensiese konsultant wil Selebi self na tronk neem
2011-12-04 08:59
Johannesburg – Hy sal Jackie Selebi, gewese polisiekommissaris en Interpol-president, persoonlik in ’n kruiwa na die gevangenis stoot.
Dit was Saterdag die woorde van Paul O’Sullivan, die forensiese konsultant wat Selebi se korrupte verhouding met die veroordeelde dwelmhandelaar Glenn Agliotti aan die groot klok gehang het.
“Dit was Vrydag presies tien jaar nadat hy my uit die polisie geskop en ek met my ondersoek teen hom begin het,” sê O’Sullivan.
Selebi se aansoek teen sy skuldigbevinding op aanklag van korrupsie is Vrydag in die appèlhof verwerp.
Hy het by die aanhoor van die nuus in sy huis in Waterkloof, Pretoria, ineengestort.
O’Sullivan sê: “Suid-Afrika se toekoms is beslis rooskleuriger sonder hom, want in die nege jaar wat hy polisiehoof was, is 150 000 Suid-Afrikaners vermoor, 500 000 verkrag en 2 miljoen beroof.
“Terwyl dit gebeur het, het hy met die Johannesburgse én internasionale mafias skouer geskuur.
“Dié man het die land amper tot op sy knieë gedwing.”
Intussen sê prof. Pierre de Vos, ’n grondwetkenner aan die Universiteit van Kaapstad, Selebi het geen gronde om hom tot die konstitusionele hof te wend en teen sy 15 jaar tronkstraf te appelleer nie.
“Behalwe as die konstitusionele hof bereid is om argumente van Selebi se regspan aan te hoor dat hy nie ’n regverdige verhoor gehad het nie, is dit die einde van die (regs-)pad vir Selebi.
“Dié argument is egter uitdruklik deur die verhoorhof verwerp én die appèlhof het geweier om enigiets daaroor aan te hoor.”
Sonwabo Mbananga, woordvoerder van die departement van korrektiewe dienste, het Saterdag gesê die hofbevel oor Selebi is duidelik.
Hy het 48 uur gehad om hom by die naaste korrektiewe sentrum vir gevangenisstraf aan te meld en dié tyd verstryk môre.
Wynanda Coetzee, Selebi se prokureur, sê weens hul kliënt se siektetoestand was daar nog nie ’n geleentheid om met hom oor ’n moontlike appèl na die konstitusionele hof te praat nie.
“Hy is sedert Vrydag in ’n stabiele toestand in die Jakaranda-hospitaal in Pretoria. As hy teen Maandagoggend steeds siek is, sal hy in ’n ambulans na die naaste gevangenis geneem word. As hy appelleer, moet hy weer om borgtog aansoek doen,” sê Coetzee.
Op ’n vraag oor wat Selebi makeer, sê Coetzee: “Sy mediese toestand kom al ’n hele ruk aan, maar die skok van Vrydag was ’n finale slag vir hom.”
Vyf appèlregters, onder leiding van regter Kenneth Mthiyane, het Vrydag in die appèlhof in Bloemfontein eenparig in hul uitspraak van 59 bladsye bevind daar is geen twyfel nie dat die staat bo redelike twyfel bewys het die gewese polisiehoof het op vier geleenthede geld van Agliotti in ruil vir polisie-intelligensie ontvang.
Intussen het die departement van justisie en grondwetlike ontwikkeling Vrydag gesê Selebi moet nou sowat R15 miljoen aan regskoste aan dié departement terugbetaal, berig Sapa.
Tlali Tlali, dié departement se woordvoerder, sê die gewone skuldinvorderingstappe sal gedoen word as Selebi nie die regskoste, wat hy belowe het om terug te betaal as hy die saak sou verloor, kan terugbetaal nie.
Volg Nuus24 op Twitter
- Rapport