Fokus op wiskunde, onderwys, sê Manuel
2010-12-18 12:42
Pretoria - As Suid-Afrika internasionaal wil meeding moet die verbetering van die gehalte van onderwys en wiskunde-uitkomste aandag kry.
So sê Trevor Manuel, minister in die presidensie gemoeid met beplanning, in die jongste verslag oor die regering se ontwikkelingsaanwysers.
Manuel het gesê ná die aanvanklike groot verbetering in die wiskunde-slaagsyfer vir matriek tussen 2001 en 2003 is die vlak van verbetering nie so indrukwekkend nie.
Die matriekslaagsyfer het tussen 2008 en 2009 selfs gedaal, maar dit kan in verband gebring word met die feit dat minder kandidate matriek in 2009 as in 2008 geskryf het.
Manuel meen ’n toename in die getal kandidate wat wiskunde slaag sal help om hoëronderwysinstellings van gehalte-kandidate te voorsien.
In 2008 het 136 184 matrikulante wiskunde geslaag en 210 134 het wiskundige geletterdheid deurgekom.
Verlede jaar was dit onderskeidelik 133 789 en 209 053 kandidate.
Die nuwe kurrikulum het in 2008 in werking getree waar kandidate tussen wiskunde en wiskundige geletterdheid kon kies. In vroeër jare het net sowat 25 000 matrikulante wiskunde in die hoër graad geslaag.
In 2006 het 110 452 kandidate wiskunde op standaardgraad geslaag en in 2007 was dit 123 813.
- Volg Nuus24 op Twitter.