Fokus op wanbesteding in Noordwes
2013-02-05 17:58
Johannesburg – Die beweerde wanbesteding van staatsfondse op regskoste in die Noordwes sal amptelik ondersoek word, het die provinsie se staande komitee oor openbare rekeninge (Skoor) Dinsdag gesê.
Hlomane Chauke, voorsitter, het gesê die ondersoek sal fokus op die misbruik van staatsfondse deur die voormalige LUR van finansies, Louisa Mabe, die huidige LUR, Paul Sebegoe, en die waarnemende hoof van die departement van finansies, Geo Paul.
"Die drie kon nie daarin slaag om 'n duidelike verduideliking aan die komitee te gee nie oor die tenderprosedure wat gevolg is met die aanstelling van Morake Prokureurs, 'n maatskappy wat meer as R15,4 miljoen betaal is vir 'n tugverhoor," het hy gesê.
Die tugverhoor was vir die geskorste hoof van die departement van finansies, Johannes Mohlala, die hoof- finansiële beampte, Harriet Kasirivu, en die uitvoerende direkteur, Peter Mogoane.
Sebegoe het gesê die komitee het besluit om die saak te ondersoek omdat openbare fondse bestee is sonder om 'n verduideliking daarvoor te gee.
Die Valke, die kantoor van die ouditeur-generaal, die Openbare Dienstekommissie, en die openbare beskermer sal aan die ondersoek deelneem.
Elkeen van dié liggame sal 'n ander deel van die ondersoek waarneem, het Chauke gesê.
"Die Valke sal fokus op die kriminele aard van die saak, en as die uitslag wys dat openbare fondse inderdaad wanbestee is, sal die komitee maniere ondersoek om dié geld te verhaal," het hy gesê.
– Volg Nuus24 op Twitter.
- SAPA
