Fifa aangevat oor “Tshwane”-advertensies
2010-07-09 16:49
Pretoria - Die Vryheidsfront Plus (VF+) het in ‘n brief aan FIFA beswaar aangeteken oor die gebruik van die naam “City of Tshwane” in plaas van Pretoria op advertensieborde en –baniere in die stad.
Die advertensie vertoon duidelik die amptelike FIFA-logo. Die advertensies word deur die Tshwane-metroraad geborg.
Die VF+ het ook gesê dat die party regsaksie oorweeg in die lig van ‘n onderneming deur FIFA aan die Advertensie Standaarde Owerheid (ASA) om nie na stede te verwys deur die name van die munisipaliteite waarin hulle val nie, maar eerder hulle ware name.
Die VF+ het talle klagtes oor die advertensies ontvang.
Volgens dr. Conrad Beyers, VF Plus-raadslid, betoon die advertensies disrespek teenoor die hoofstad van Suid-Afrika, naamlik Pretoria, en behoort FIFA nie toe te laat dat sy handelsmerk misbruik word vir die bevordering van kleinlike politieke agendas deur die plaaslike ANC nie.
Die VF+ het benadruk dat ‘n politieke oplossing gevind moet word vir die naamdispuut en het bygevoeg dat die gebruik van ‘n gekombineerde naam vir Pretoria en Tshwane, soos gebruik tydens Wêreldbeker-wedstryde, ‘n moontlike pad vorentoe mag aandui wat vir die oorgrote meerderheid van die stad se diverse gemeenskappe aanvaarbaar kan wees.
Volg Nuus24 op Twitter.