Fietsryer bly hy leef
2011-07-21 08:05
Bloemfontein - ’n Jong Bloemfonteinse atleet is dankbaar hy leef nog nadat ’n motor hom glo doelbewus van sy fiets gestamp het.
Berndt Burger (23) ’n driekamp-atleet wat Suid-Afrika al verskeie keer oorsee verteenwoordig het, sê hy is geskok oor wat met hom gebeur het en dit is ’n wonderwerk dat hy so lig daarvan afgekom het.
Burger het Saterdag omstreeks 15:30 op sy fiets in Nelson Mandelarylaan, naby John Williams-motors in Langenhovenpark, geoefen toe ’n maroen Mercedes-Benz hom van sy fiets gestamp het.
“Die motor het uit die ander baan gekom en my, terwyl ek binne die geel streep gery het, gestamp.”
Burger sê hy het deur die lug getrek en op sy kop te lande gekom. Sy nek het “ontsaglik gepyn”.
Die bestuurder van die Mercedes het weggejaag.
Burger het ligte beserings opgedoen, onder meer ’n geskeurde skouerligament.
“My lies is erg geswel en die dokter sal eers kan vasstel of daar iets fout is wanneer die swelsel sak.”
Burger het ook skraapplekke opgedoen.
Hy sê dis ’n wonderwerk dat hy leef en nie ernstiger beseer is nie.
“Ek oefen juis op daardie pad omdat daar borde is wat motoriste maan om bedag te wees op fietsryers.”
Burger het onlangs ’n skoueroperasie gehad en kon lank nie oefen nie.
“Om oorsee te kan deelneem, moet jy goeie tye aanteken om te kwalifiseer. As ek nou so beseer is dat ek nie kan oefen en teen Februarie goeie tye aangeteken het nie, sal ek nie oorsee kan gaan deelneem nie.”
Kapt. Chaka Marope, polisiewoordvoerder, sê ’n klag van roekelose en nalatige bestuur word ondersoek.
Volg Nuus24 op Twitter.
- Volksblad