Fietsryer sterf in ongeluk met voetganger

2012-05-05 12:13

Johannesburg – 'n Fietsryer is dood nadat hy in 'n ongeluk met 'n voetganger in Roodepoort, wes van Johannesburg betrokke was, het paramedici Saterdag gesê.

Paramedici het Vrydag by die ongelukstoneel opgedaag waar hulle die 32-jarige fietsryer dood in die pad gevind het, het ER24-woordvoerder Vanessa Jackson gesê.

Die voetganger, 'n man in sy veertigs, het 'n ernstige kopbesering opgedoen en was in 'n verwarde toestand. Hy is na die Leratong-hospitaal geneem.

"Dit is onduidelik presies wat die botsing tussen die twee veroorsaak het, maar blykbaar was die voetganger besig om die pad oor te steek en die fietsryer het afdraand gery naby die Wilgerood-pad. Die gebied is nogal winderig, het Jackson gesê.

Volg Nuus24 op Twitter.

- SAPA