Fietsryer se dood skok wyd
2011-01-20 07:15
Bloemfontein - Hy kan die bestuurder van die vragmotor wat sy dogter doodgery het, nie vir die ongeluk blameer nie, en hy sal dit graag vir hom wou sê.
Só het Deon Swart, pa van Carla Swart, Suid-Afrika se voorste vroue-fietsryer, Woensdag uit Amerika gesê nadat sy dogter Woensdag op die Marquard-pad in die Vrystaat in ’n tragiese sameloop van omstandighede gesterf het.
“Uit die inligting wat aan my bekend is, wil dit voorkom asof die bestuurder alles in sy vermoë gedoen het om die ongeluk te probeer vermy,” het ’n bewoë Swart uit Atlanta gesê.
“Ek dink Carla kon dalk ’n oordeelsfout begaan het omdat sy meer gewoond is aan die Amerikaanse paaie waar die motors aan die regterkant ry.”
Die ongeluk het gebeur terwyl Carla tydtoets-oefeninge gedoen het.
Barry Austin, Fietsry Suid-Afrika se spanbestuurder, sê hy het gesien haar fietsrekenaar val af. “Ek het dadelik my motor gestop om dit te gaan optel. Toe ek uitklim, het ’n vragmotor verby my gejaag.
“Carla het in die ry oor haar linkerskouer omgekyk. Toe sy sien ek het reeds gestop, het sy na regs uitgeswaai en reg voor die aankomende vragmotor beland.
“Ek kon sien hoe die bestuurder van die vragmotor erg rem trap. Hy het selfs na regs uitgeswaai in ’n poging om Carla nie raak te ry nie, maar dit was vergeefs.”
Austin sê toe hy by Swart kom, het sy steeds asemgehaal, maar sy was vol bloed. Austin het met haar na die hospitaal gejaag.
“Toe ek daar kom, het die dokter gesê sy is reeds dood.”
Deon Swart kon nie sy trane terughou terwyl hy oor sy dogter se passie vir fietsry praat nie.
Hy sê sy vir fietsry gelewe. So groot was haar passie vir fietsry dat sy selfs haar verlowing verbreek het om al haar aandag aan fietsry te kan bestee.
Swart se dood is as ’n swart dag vir Suid-Afrikaanse en selfs internasionale fietsry bestempel.
Sy sou feitlik vir seker Suid-Afrika aanstaande jaar op die Olimpiese Spele in Londen verteenwoordig het. Kenners het voorspel sy sou ’n medalje vir Suid-Afrika kon wen. Sy het verlede jaar verskeie eerstes in Suid-Afrikaanse fietsry opgelewer. Op die Wêreld-padbyeenkoms in Australië was sy tiende en op die Statebondspele het sy agtste geëindig. Sy het ook ’n tiende plek in ’n Wêreldbeker-ren losgejaag.
Sy sou vanjaar vir die Amerikaanse HTC High Road-span, die voorste vroue-span in die wêreld, gery het.
Huldeblyke van oor die wêreld heen het Woensdag op Facebook ingestroom.
Benewens haar pa word Swart oorleef daar haar ma, Karin, en suster, Lelanie, wat almal in die VSA is.
- Volksblad
