Fietsongeluk: drywer glo dronk
2010-03-12 11:06
Kaapstad – ‘n Man in sy vroeë dertigs is vir dronkbestuur in hegtenis geneem nadat hy Vrydagoggend glo twee fietsryers in Hermanus omgery het.
“Beide mans is na die Hermanus MediClinic geneem waar hulle in ‘n stabiele toestand is,” het Margaret Smith van die hospitaal aan News24 gesê.
Een van die beseerdes is na die Vergelegen MediClinic in Somerset Wes oorgeplaas.
Toe polisie op die toneel arriveer het hulle die mans op die grond gevind en die verdagte en sy motor was nêrens te sien nie, het supt. Phindelwa Mavakala gesê.
“Hy het eers sowat ‘n kilometer verder gestop en toe teruggestap en erken dat hy die fietsryers raakgery het.”
Met sy inhegtenisname is gevind dat hy dronk was, het Mavakala gesê.
Die verdagte sal na verwagting Maandag in die landdroshof in Hermanus verskyn.
Vroeër in die week is drie fietsryers in Oudtshoorn doodgery terwyl hulle vir die naweek se Argus-fietstoer geoefen het.
News24