Fetus in sak gevind
2009-09-18 13:53
Durban - ’n Fetus is Vrydag in ’n plastieksak buite ’n gebou in Westmead, naby Pinetown, gevind.
Lede van die publiek het die KwaZulu-Natalse polisie in kennis gestel van die fetus, het insp. Solomon Mbele gesê.
Niemand is nog in verband met die voorval in hegtenis geneem nie, maar ’n saak van verberging van geboorte is oopgemaak.
In ’n soortgelyke voorval is ’n pasgebore baba op ’n sypaadjie in Durban-middestad gevind. Die baba se naelstring was nog daaraan vas.
’n Vrou is Dinsdag naby KwaMsane in KwaZulu-Natal in hegtenis geneem ná sy volgens bewering haar pasgebore baba lewendig in ’n toilet gegooi het.
- Sapa