Feestyd eis 1 232 op SA se paaie
2012-01-04 07:28
Johannesburg – Volgens voorlopige syfers van die Padverkeerbestuurskorporasie (RTMC) is effens minder mense in Desember in padongelukke dood as in dieselfde tydperk die afgelope twee jaar.
Die RTMC het in ’n verklaring gesê 1 232 mense is verlede maand in 1 027 motorongelukke op Suid-Afrikaanse paaie dood.
Dié syfer sal gewysig word wanneer die RTMC alle data oor noodlottige padongelukke van al die provinsies ontvang het.
Altesaam 1 358 mense is gedurende Desember 2010 op die land se paaie dood en 1 549 oor dieselfde tyd in 2009.
Volgens Gary Ronald, woordvoerder van die Automobiel Assosiasie, sal dit nog ’n maand neem voordat die finale aantal padsterftes bekend sal wees. Hy meen die finale syfer sal naby aan verlede jaar s’n wees.
“Al is die syfer uiteindelik laer as verlede jaar, is dit nie rede om fees te vier nie. Ons moet ’n noemenswaardige daling in die aantal sterftes sien.”
Hy meen dit is slegs ’n sukses as minstens 1 000 mense minder oor Desember sterf.
Volgens hom kan die aantal padsterftes toegeskryf word aan die feit dat daar nie genoeg gedoen is om dit te vermy nie.
“Daar is strategieë om padsterftes in bedwang te bring, maar daar is nie konkrete planne om die strategieë van stapel te stuur nie.
“Wetgewing is nie genoeg nie. Opvoeding is die sleutel.”
Luidens die RTMC se verklaring het die metropolisie in die laaste week van Desember 179 131 voertuie afgetrek en 373 motoriste in hegtenis geneem.
– Volg Nuus24 op Twitter
- Die Burger