Families twis oor dwelmgemors
2011-12-18 09:07
Sabelo Skiti en Erna van Wyk
Johannesburg – Twee Oos-Kaapse families beskuldig mekaar oor en weer oor wie verantwoordelik is vir die dwelm-gemors waarin hul dogters is.
Nolubabalo (Babsie) Nobanda (23) is in ’n Thaise tronk nadat sy Maandag op Bangkok se Suvarnabhumi-lughawe gearresteer is oor 1,5 kg se kokaïen in haar haarlokke.
Die geraamde waarde is R1,2 miljoen.
Haar vriendin, Sulezi Rwanqa, is intussen in Thailand gestrand en desperaat om uit te kom.
Albei is van Grahamstad en ken mekaar volgens hul families net ’n paar maande lank. Al het hulle saam gereis, is Rwanqa (25) nie gearresteer nie. Dit is onduidelik of sy ook dwelms na Thailand gesmokkel het.
Honjiswa Mbewu, Nobanda se ma, sê die vroue was op ’n kort vakansie en sou hierdie naweek terugkeer.
Rwanqa se ouer suster was onder die indruk dit was ’n werkreis.
Die familie het egter vroeër gesê hulle het gedink die twee was met vakansie in Port Elizabeth.
Die Rwanqas is ontevrede oor ’n stelling deur Mbewu dat Sulezi die probleme veroorsaak het.
“Babsie se ma het gesê haar dogter het geen rede gehad om hierdie dinge te doen nie omdat sy haar gereed gemaak het om by Rhodes of Fort Hare te gaan studeer en niks kortgekom het nie.
“Daar word nou gemaak asof my dogter, omdat ons arm is, die een is wat haar gedwing het om te doen wat sy gedoen het,” het Rwanqa se ma, Noskuta, gesê.
Asanda Gqeke, ’n vriendin van Nobanda, het vroeër gesê Nobanda het vir haar ’n bankbalans van R20 000 gewys ’n maand voordat sy oorsee vertrek het.
Mbewu het gesê die familie het nie geweet waar haar dogter na bewering die R20 000 vandaan gekry het nie en het dit oor die nuus gehoor.
Noskuta Rwanqa is baie bekommerd omdat haar dogter alleen in ’n vreemde land is en het gesê sy wil haar aanmoedig om die Suid-Afrikaanse ambassade in Thailand op te spoor.
Haar dogter het tydens ’n oproep van ’n betaaltelefoon af gesê haar geld raak op.
Intussen het die familie van Janice Linden (36) nog nie haar as gekry nie, berig Sphumelele Mngoma.
Sy is Maandag in China tereggestel.
Die Suid-Afrikaanse regering het ook nog nie met hulle gekommunikeer nie.
“Wat ons weet, is wat ons in die media lees en hoor. Ons weet nie eens wanneer my suster se as in Suid-Afrika gaan aankom nie,” sê Linden se suster, me. Nomvuyo Mthalane.
Linden is in 2008 op ’n Chinese lughawe met 3kg se dwelms gearresteer.
Sy het volgehou sy is onskuldig.
- Rapport