Familie stomgeslaan oor ervare stapper se dood

2012-11-07 10:29

Kaapstad – Die familie van ‘n ervare stapper wat op die Bainskloofpas in die Wes-Kaap gesterf het, sê hulle is in die duister oor sy dood.

“Ons weet nie wat sy dood veroorsaak het nie. Ons weet hy het op die pas gaan stap. Ek het geen antwoorde nie,” het John Barclay aan die Cape Times gesê nadat sy broer, Robert (24), gesterf het.

“Hy was ‘n ervare stapper en was mal oor die buitelewe en avontuur.”

Robert het saam met vriende by ‘n gastehuis gebly toe hy Saterdag omstreeks 18:00 sonder ‘n rugsak of verversings gaan stap het. Hy het nooit teruggekeer nie.

‘n Drie dae lange soektog is van stapel gestuur, waar 79 mense die bergagtige reeks gefynkam het.

Keri Davids, woordvoerder vir die nooddienste, sê die stapper se lyk is Dinsdagoggend in ‘n diep kloof gevind. ‘n Reddingspan het vir twee ure gespook om die lyk uit die kloof te haal.

Dié kloof is aan die Wellington-kant van die Bainskloof-pas geleë.

Ao. November Filander sê ‘n ooggetuie het na bewering gesien hoe iemand by ‘n krans op die pas, afgespring het.

Filander sê die voorval word ondersoek.

Volg Nuus24 op Twitter 

- SAPA