Familie soek antwoorde oor koma, breinskade
2010-07-03 07:30
Die Burger
Port Elizabeth. - ’n Familie van Algoapark is verpletter nadat hul seun, wat weens ’n rugbybesering hospitaal toe is met ’n gebreekte been, in ’n koma verval en nou breinskade opgedoen het.
Edward van Dyk (19) se familie moes eergister die by sy neuroloog hoor dat hy nooit weer vir homself sal kan sorg nie.
Hulle dring nou aan op ’n onafhanklike ondersoek om vas te stel of daar nalatigheid aan die kant van die Livingstone-staatshospitaal was waar Edward geopereer is en nou steeds behandel word.
“Hy het ’n paar dae gelede sy oë oopgemaak en sy arm het beweeg, maar ons het gedink dat hy nog in ’n koma is. Volgens toetse sal hy egter nie verbeter nie, soos hy nou is, is hoe hy vir die res van sy lewe sal wees,” het Deon Joubert, ’n familielid, gesê.
Edward het op 26 Mei sy linkerbeen tydens ’n rugbywedstryd vir die Park o.19 rugbyspan gebreek. Hy is by Livingstone opgeneem en het agt dae later ’n operasie vir die besering ondergaan.
Hy het na die operasie net nie wakker geword nie.
’n Bedroefde Michelle van Dyk, Edward se ma, het gesê toe sy die dag ná die operasie vir hom gaan kuier het, het sy op ’n toegetrekte gordyn om sy bed afgekom.
“Ek is gesê om buite te gaan staan. Ek wou weet wat is fout...of hy lewe, of hy dalk bloei. Ek het net ineen gestort toe ek nie antwoorde kry nie, ek is na ’n kamer geneem waar ek gesê is dat my seun net nie wakker geword het nie,” het sy gesê.
“As ’n onafhanklike ondersoek bevind dat daar nalatigheid aan die hospitaal se kant was en dat dit vir sy toestand verantwoordelik is, sal die familie beslis regstappe neem,” het Joubert gesê.
Edward se ma, en pa, Edward sr., twyfel nie vir een oomblik dat ’n blink toekoms vir hulle seun gewink het nie. Hy het ’n studiebeurs verwerf vir sy studies as tweede-jaar megatronikastudent aan die Port Elizabeth-kollege.
Thulani Madonsela, uitvoerende hoof van die Livingstone-hospitaal, was met herhaalde pogings gister nie beskikbaar vir kommentaar nie. Ook die Oos-Kaapse woordvoerder van die gesondheidsdepartement, Sizwe Kupelo, kon nie kommentaar lewer nie.
Volg Nuus24 op Twitter.
- Die Burger