Familie, passasiers beseer in taxi-ongeluk
2011-04-24 18:01
Johannesburg – ‘n Familie van drie en die passasiers van ‘n
minibus taxi is beseer toe die voertuie waarin hulle gery het naby Vereniging
bots.
Volgens Andre Visser, ‘n woordvoerder vir
ER24, was daar 'n kar met drie vroue in wat in die kant van ‘n minibus taxi vasgery het.
“Die taxi het omgeslaan en een van die passasiers
het in die proses uitgeval,” het Visser gesê.
“Die taxi het op sy wiele,
bo-op die passasier wat uitgeval het, te lande gekom.”
Toe die ER24 personeel by die toneel aankom,
was die plaaslike brandweer besig om die vrou onder die taxi te probeer uitkry.
Sy is ernstig beseer en is per ambulans
hospitaal toe gehaas.
‘n Ouma, haar dogter en die dogter se babatjie
was in die kar wat in die ongeluk betrokke was.
Beide die ouma en haar dogter is ernstig
beseer.
“Gelukkig het die baba geen beserings opgedoen
nie,” het Visser gesê.
Die taxi-bestuurder en twee ander passasiers
het op die toneel rondgeloop toe die ER24 personeel daar aankom, maar is na die provinsiale hospitaal in
Vereniging geneem vir toetse.
Volg Nuus24 op Twitter.
- SAPA