'Facebook-verkragter' pleit skuldig
2011-10-12 13:53
Durban – Die man wat die “Facebook-verkragter” genoem word, het skuldig gepleit.
Thomas Bester het Woensdagmiddag in die Durbanse landdroshof skuld erken op al vier aanklagte teen hom.
Hy is daarvan aangekla dat hy twee vroue verkrag en beroof het.
Narendra Narotam, sy prokureur, het ‘n verklaring in die hof gelees waarin hy verduidelik hoe sy kliënt die misdade gepleeg het.
Hy erken dat hy twee vroue in Augustus in Westville en Umhlanga, in Durban, verkrag het.
Alhoewel hy hulle verkrag het, was sy bedoeling net om waardevolle items soos selfone, kredietkaarte en horlosies te steel.
Dit het in die hof aan die lig gekom dat Bester voorheen aan bedrog skuldig bevind is.
Verdere inligting oor die veroordeling sal na verwagting Vrydag bekendgemaak word wanneer hy weer in die hof verskyn.
Narotam het voorgestel dat ‘n sielkundige sy kliënt evalueer aangesien Bester sy eie lewe probeer neem het.
Hy het dinge vir my vertel wat ek nie hier kan noem nie. Ek glo ‘n sielkundige verslag word benodig,” het hy gesê.
Bester is verlede week in Alberton, suid van Johannesburg, hegtenis geneem.
Bester het na bewering e-pos aan vroue gestuur waarin hy homself as ‘n internasionale modelagent voordoen en die vroue oortuig dat die agentskap in hulle belangstel.
Ander slagoffers het hy persoonlik ontmoet en dan later hul ‘vriend’ op Facebook geword het om sodoende kontak te behou.
Volg Nuus24 op Twitter
- SAPA