Facebook-man wil wit kinders se dood vier
2013-02-06 11:18
Johannesburg – ‘n Facebook-gebruiker wil die dood van 42 wit kinders 28 jaar gelede in 'n busongeluk vier, het The Times Woensdag berig.
Zama Khumalo (24) het aan sy 493 vriende op die sosiale netwerk gesê hy gaan ‘n uitnodig stuur na 'n “groot swart braai” om die dood van 42 kinders te vier.
Die kinders is dood toe 'n skoolbus op 27 Maart 1985 in die Westdene-dam in Johannesburg beland het.
Die braai sal op die herdenking van die ramp wees en daar sal platejoggies en vuurwerke wees, het die koerant berig.
Volgens die koerant het 'n familielid van een van die slagoffers op die inskrywing afgekom. Katherine Shaddock was geskok toe sy uitvind haar halfsuster, Mary-Ann Miles, een van die slagoffers, se dood sal gevier word.
Khumalo het die name van 24 van die 42 slagoffers gelys, met ‘n byskrif wat lees hul dood word “baie waardeer, my Here!”
Hy beweer hy is ‘n joernalis by die Daily Sun. Die koerant se bestuur het hom egter van Khumalo gedistansieer en sê hy is nie meer ‘n werknemer nie.
Isaac Mangena, woordvoerder vir die Suid-Afrikaanse menseregtekommissie, het aan The Times gesê dat die kommissie nie ‘n formele klagte ontvang het nie en dat die inskrywing “vol haat vir ‘n ander ras” is.
Khumalo het Saterdag egter van deuntjie verander.
“Ek het tyd geneem om te dink oor die Westdene-inskrywing wat ek vroeër die week gemaak het... die saak het soveel druk veroorsaak... ek het haatboodskappe ontvang,” het hy op sy Facebook-blad geskryf.
“Ek vra om verskoning en is baie spyt oor die inskrywing...”
– Volg Nuus24 op Twitter
- SAPA
