FW 'moet sy mond hou'
2012-11-01 18:00
Johannesburg – Oudpres. FW de Klerk probeer die Nasionale Party as 'n beter regerende party as die ANC uitbeeld, het die ANC in die Oos-Kaap Donderdag gesê.
"Hy vergeet in ons 18 jaar van demokratiese regering, het ons dinge gedoen wat hulle opsetlik besluit het om nie te doen nie," het Lubabalo Oscar Mabuyane, provinsiale sekretaris, in 'n verklaring gesê.
"Ons ekonomie is in die toestand waaraan dit is omdat hulle swart mense letterlik uit die ekonomie en samelewing geskop het," het die verklaring gelui.
Die ANC het reageer op berigte dat De Klerk die ANC blameer het vir die land se toenemende ekonomiese en sosiale probleme.
De Klerk het Woensdag in 'n toespraak voor sakeleiers teen die ANC se beleid oor die hervedeling van rykdom uitgevaar.
Hy het gesê die party gaan 'n situasie veroorsaak "waar mense se vooruitsigte weer bepaal sal word deur ras, eerder as individuele verdienste en omstandighede".
De Klerk het erken dat sommige van die land se probleme van die apartheidsjare geërf is, maar dat pres. Jacob Zuma nie daarin geslaag het om dit op te los nie.
“... Dis nie regverdig om al ons huidige probleme op die verlede te blameer nie.”
Hy het bygevoeg dat die ANC “hoofsaaklik vir die huidige krisis verantwoordelik" is.
Mabuyane het gesê die ANC sal sy beleid nie verander nie.
"Ons sal voortgaan met die regstellende aksie, swart ekonomiese bemagtigingsprogram en ander ekonomiese ontwikkelingsbeleid wat voortgaan om ons ekonomie te laat groei," het hy gesê.
"Die beste ding wat De Klerk kan doen is om sy mond te hou of om wit Suid-Afrikaanse maatskappye aan te moedig om hulle by die nasionale demokratiese revolusie aan te sluit deur werksgeleenthede te skep, opleidingsgeleenthede te verskaf en swart mense salarisse te betaal wat gelyk is aan hulle bruin, Indiese en wit eweknieë."
– Volg Nuus24 op Twitter.
- SAPA
