FNB het nié advertensie onttrek

2013-01-22 16:21

Kaapstad – FNB het Dinsdag berigte ontken dat hy advertensies wat deel is van sy You can Help-veldtog gaan onttrek, berig Fin24.

Die veldtog volg ná 'n onafhanklike opname wat die bank gedoen het. Volgens dié opname het 70% van die jeug gesê hulle is positief oor die toekoms van die land.

"Ons het die uitdaging aangeneem omdat ons sterk glo dat die kinders van Suid-Afrika 'n belangrike stem het en 'n groot rol speel in die toekomstige sukses van die land. Elke onderhoud was spontaan en ongesensor – elke kind praat uit die hart," het Bernice Samuels, woordvoerder van FNB, gesê.

In reaksie op die vraag van Fin24 of FNB besluit het om die advertensies te onttrek, het Samuels gesê: "Nee, ons gaan nie die advertensie onttrek nie".

"Die advertensie is nie van die lug gehaal nie. Die uittreksels op die blogwebwerf is verwyder. Ons het gedink dit is in die beste belang van die kinders om die uittreksels solank te verwyder totdat die misverstand uitgeklaar is."

FNB het bevestig dat die veldtog sal voortgaan.

Die ANC en sy jeugliga het Maandag teen die bank uitgevaar oor die advertensie-veldtog. Die regerende party het die advertensie veroordeel en beskryf as 'n blatante aanval op die regering en die regerende party.

– Volg Nuus24 op Twitter