FNB stuur verkeerde boodskap uit - DA

2013-01-26 07:50

Johannesburg – Eerste Nasionale Bank (FNB) se verskoning aan die ANC stuur ‘n boodskap aan maatskappye uit dat dit nie aanvaarbaar is om die regerende party te kritiseer of te bevraagteken nie, het die DA Vrydagaand gesê.

“Deur dit te doen [om verskoning te vra] het hy gewys dat dit aanvaarbaar is om deur die regerende party geboelie te word en dit het vir die ANC gewys dat sy taktieke werk om kritiese stemme stil te maak,” het Mmuse Maimane, woordvoerder van die DA, in ‘n verklaring gesê.

Andersdenkende stemme is gesond in ‘n demokrasie en die ANC se oordrewe reaksie op FNB se advertensie is ongepas en kleinlik. Die gemak waarmee FNB bereid is om voor die ANC te kruip en sy posisie op te gee is net so onvanpas en sleg vir demokrasie.

Hy sê dit is nie ‘n groot verrassing dat baie Suid-Afrikaners dit reeds oorweeg om hul rekeninge by FNB te sluit nie.

Die ANC het vroeër gesê FNB het om verskoning gevra vir sy You Can Help-veldtog, wat bestaan uit ‘n reeks video’s van kinders in skoolunivorm wat hul hoop vir die land uitspreek.

In ‘n verklaring het die ANC gesê hy het met FNB vergader en uitgewys dat die video’s ‘n opsetlike aanval teen die party is en dat dit ‘n negatiewe impak op sakevertroue het wat die bevordering van beleggings in die land kan ondermyn.

– Volg Nuus24 op Twitter
 

- SAPA