FNB onttrek omstrede advertensies

2013-01-22 10:37

Kaapstad – Die bankgroep FNB sê dit was nooit sy bedoeling om die regering in sy jongste advertensieveldtog te kritiseer nie, berig die SABC.

FNB het sy You can help-handelsmerkveldtog verlede week deur 'n reeks aanlynvideo's in Soweto vrygestel. In dié video's deel Suid-Afrikaanse jeug hul mening oor die land.

Die bank het egter die advertensies onttrek nadat die ANC en sy jeugliga Maandag teen hom uitgevaar het. Die ANC het die advertensie veroordeel en beskryf as 'n blatante aanval op die regering en die regerende party.

Die bank het aanvanklik geen amptelike redes verskaf oor hoekom die advertensies onttrek is nie en het slegs gesê sy bedoelings is verkeerd geïnterpreteer, berig Mail & Guardian.

"Ongelukkig het ons besluit om die video's te verwyder omdat die deelnemers vrees vir weerwraak," het Bernice Samuels, die bank se hoof- bemarkingsbeampte, later op Talk Radio 702 gesê.

Samuels het gesê aantygings van hoogverraad is teen die jeugdiges wat deel was van die advertensie, gemaak.

Die meerderheid van die jeugdiges wat aan die veldtog deelgeneem het, het gesê die land se uitdagings strek van werkloosheid tot die hoë misdaadsyfer.

** FNB het intussen ontken dat hy die veldtog onttrek het.

– Volg Nuus24 op Twitter