FNB nié jammer oor advertensies, sê baas

2013-02-07 10:53

Johannesburg – Eerste Nasionale Bank (FNB) het nié om verskoning gevra vir aanlynvideo's wat deel is van sy advertensieveldtog nie, het die hoof- uitvoerende beampte van die bank gesê.

"Ons het nie om verskoning gevra vir die advertensie nie," het Michael Jordaan geskryf in 'n rubriek wat in Business Day gepubliseer is.

Die You Can Help-veldtog bestaan uit verskeie video’s van kinders in skooluniforms wat hulle hoop vir die land uitspreek.

Jordaan het gesê die onderhoude sou nie deel wees van die advertensie nie.

"Ons het beslis geen voorneme gehad om politiek te speel nie, en dit is nie logies dat FNB doelbewus die regering of die ANC aangeval het nie," het hy geskryf.

Kort ná die videos vrygestel is, het die ANC sy afkeur oor die veldtog uitgespreek. Die ANC-jeugliga het gesê die advertensies grens aan hoogverraad.

Die ANC het op 24 Januarie in 'n vergadering met FNB gesê die veldtog is daarop gemik om die party en die regering in 'n swak lig te stel.

'n Dag daarna het die party in 'n verklaring gesê die bank het om verskoning gevra.

Die Demokratiese Alliansie het toe gesê die verskoning dui daarop dat dit nie aanvaarbaar is om die regerende party te bevraagteken of te kritiseer nie.
       
– Volg Nuus24 op Twitter

- SAPA