Evolusieherrie: Moderator sal nie bedank
2010-08-02 07:54
Bloemfontein - Prof. Piet Strauss oorweeg dit geensins om as moderator van die NG Kerk te bedank nie.
Strauss het in ’n onderhoud gesê hy besef die herrie wat losgebars het na aanleiding van die standpunt wat hy oor evolusie ingeneem het, is ’n baie emosionele kwessie.
Hy het vroeër aan die tydskrif Juiggesê hy glo aan die Bybelse skeppingsleer, met God as Skepper van die hemel en die aarde.
Hy het later gesê daar is geen bewyse van ’n oorgang tussen dier en mens nie.
Dit het tot woede aanleiding gegee.
Dr. Jurie van den Heever, paleontoloog van die Universiteit Stellenbosch, het selfs woorde soos “dom” en “belaglik” gebruik in sy reaksie op Strauss se standpunt.
“Ek het nie besef evolusie gaan soveel emosie ontlok nie. Maar al het ek geweet, sou ek nie anders daaroor gepraat het nie, want dit is my oortuiging.”
Strauss sê kritiek wat hy gekry het – party mense het selfs gesê hy moet as moderator bedank – gaan nie oor sy argument oor evolusie nie.
“Die kritiek is persoonlik en nydig. En nêrens word my argument aangevat nie.”
Hy het gesê die algemene sinode en moderamen besluit oor sy loopbaan as moderator.
“En hulle steun my standpunt.”
Die moderamen sê in ’n verklaring die NG Kerk bely dat God die Skepper van die hemel en die aarde is.
Oor hoe dit gebeur het, kan die kerk hom egter net verwonder.
Hy het ook gesê sy oortuiging is ’n vaste kernwaarde.
Strauss het gesê hy glo nie die NG Kerk jaag met hom as moderator ’n konserwatiewe beeld na nie.
“Die kerk is op ’n pad van gesonde vernuwing en dit is geskoei op die Woord van die Here. Solank die vernuwing geanker is in die Woord van God, kan dit plaasvind.
“Die erediens is ’n tweegesprek tussen God sy en gemeente. En die fundamentele waarde moet bly.”
Oor die voortslepende probleem van die Belhar-belydenis – waaroor Strauss uit sommige oorde gekruisig en ander geloof word – het hy gesê: “Soos evolusie, is die Belhar-belydenis ’n baie emosionele kwessie. Dit maak dit baie moeilik.
“Ek het nog altyd geglo Bybelse versoening is nodig. Dit moet gedoen word op ’n manier wat die reg en die Grondwet respekteer en onreg herstel.
“Nuwe vorms van verdrukking moet ook nie toegelaat word nie.”
Hy het gesê die Bybelse opdrag is duidelik genoeg en die Belhar-belydenis sal bloot in ’n mate ’n herhaling hiervan wees.
Oor sy leierskap as hoofleier van Die Voortrekkers is hy ook onlangs in die media gekap.
Hy sê die antwoord oor Die Voortrekkers se bestaansreg kom uit die monde van dié jeug wat onomwonde sê hulle wil voortgaan.