'Eugene Terrorblanche' maak opslae
2011-08-29 08:06
Bloemfontein - Die man op die opspraakwekkende “trofee”-foto wat met ’n glimlag en ’n jaggeweer by ’n lêende kind kniel, het die kind glo betaal om só te poseer.
So het die man na bewering in 2007 aan die polisie gesê toe ’n ondersoek na dié foto gedoen is, het kol. McIntosh Polela, woordvoerder van die Valke, Sondag gesê. Dié foto, waarin dit lyk asof die kind dood is, het opspraak gewek nadat Sunday Times dit Sondag gepubliseer het.
Volksblad het in 2008 al oor die omstrede foto berig. Dit het toe verskyn op ’n Facebook-groep met die naam “ek laaik nie n (sic) houtkop nie sou (sic) what”.
Die groep is begin deur studente van die Noordwes-Universiteit en het in ’n stadium 10 616 lede gehad. Die ledetal het vinnig afgeneem namate dit meer omstrede geword het.
Die universiteit het destyds tugstappe teen sewe studente gedoen weens dié groep. Een is geskors en die klagte teen die ander ses is teruggetrek nadat geen bewyse gevind kon word dat hulle hul met die groep verbind nie.
Die naam van die student wat geskors is, is destyds nie bekend gemaak nie omdat dit ’n interne saak was en hy verlof tot appèl gekry het.
Die foto het in Junie verlede jaar wéér op Facebook opgeduik, dié keer op die profiel van ene Eugene Terrorblanche. Polela sal vandag ’n verslag kry oor wat die uitkoms van dié ondersoek was.
“Die man op die foto het glo aan die polisie gesê hy het die kind betaal om só te lê,” het Polela gesê.
“Die vraag is hoekom dié foto nou weer op Facebook opgeduik het, want dis slegte smaak. Die polisie sal ondersoek wie dit op Facebook publiseer het, want dit is ’n foto wat ’n stelling maak.”
Helen Zille, DA-leier, het gesê of dié foto eg of gemanipuleer is, is nie die kwessie nie. Volgens Zille is die vraag eerder hoe iemand dit gepas kon vind om só ’n gruwelike foto op sy Facebook-bladsy te plaas. “Die nasionale reaksie op dié foto is verslaentheid en afsku. Of die foto eg is of nie, dit beeld ’n toneel van erge geweld deur ’n man teenoor ’n kind uit. Die doel is om rassehaat en polarisasie te ontlok.”
Zille het gesê elke moontlike poging moet aangewend word om “Eugene Terrorblanche” se sowat 600 vriende te kontak oor waarom hulle die publikasie van die foto nie by die polisie aangemeld het nie.
Zweli Mnisi, woordvoerder van Nathi Mthethwa, minister van polisie, het gesê die polisie se besluit om dié foto te ondersoek, het niks met ras te doen nie.
Mnisi het gesê die feit dat dit lyk of die kind dood is terwyl iemand daaroor glimlag, is “ontstellend”.
“As die doel van dié foto is om geweld of rassisme aan te hits, is dit ’n strafbare oortreding,” het Mnisi gesê.
Volg Nuus24 op Twitter.
- Volksblad