Ervare boer huil ná drie veldbrande in 24 uur
2010-08-27 08:53
Koppies. – Dit was eers toe hy noodgedwonge sy 15 voerkalwers van die hand moes sit dat hy “behoorlik” gehuil het. Só sê ’n deurwinterde boer van Koppies wat weens ’n verwoestende veldbrand met veeverlies van R80 000 sit.
Willie Gutter van die plaas Gegun buite Koppies sê benewens dié 15 voerkalwers wat hy na ’n slagplaas moes stuur, het drie voerkalwers en drie dragtige koeie doodgebrand. Hy het ook 300 bale voer verloor.
Gutter is een van die boere in die Koppies-omgewing wat met die meeste skade sit ná drie veldbrande wat die omgewing in ’n tydperk van minstens 24 uur geteister het.
Elders in die omgewing is meer as 1 000 hektaar in die brand vernietig. In mnr. Philip Steyn van die plaas Mooiplaas se wildkamp het ’n hartebees en drie volstruise doodgebrand.
Die waarde van die hartebees beloop R4000 en die volstruise R1000 stuks.
Benewens 130 hektaar wat op Steyn se plaas vernietig is, het hy ook 500 bale voer verloor.
Die brande oor minstens ses plase heen het die landskap buite Koppies nou in swart gehul.
Die verskroeide aarde is vir etlike kilometers op die Heilbron-grondpad te sien.
Gutter sê die brand het hom “finansieel vernietig”.
“Die vraag is, wat maak ek nou vorentoe? Ek is ’n klein boer en dié het my hard geslaan,” het ’n verslae Gutter gister aan Volksblad gesê.
Gutter sê sy vrou, Johanna, vat die terugslag erg.
“Ek sal nou die skerwe moet begin optel. Al wat ek het, is geloof.
“Ek het die 15 voerkalwers slagplaas toe gestuur, waaruit seker 10?kg vir ontbening gekry kan word. Dit was eers toe ek die kalwers op die wa gelaai het dat ek behoorlik gehuil het.”
Die Koppies-boere staan mekaar só by dat dit ’n mens eintlik bewoë maak, sê Gutter.
Van die ander boere het vir hom voerbale geskenk.
Steyn sê dit is nie bekend hoe die vuur ontstaan het nie.
“Iemand het seker langs die pad ’n brandende ding by die motor uitgegooi,” sê hy.
Die eerste brand is by die Renosterrivier geblus.
“Die wind het egter weer opgekom en alles het van voor af opgevlam. Die vuur het al langs die rivier beweeg en by ’n draai oor die rivier gespring,” vermoed Steyn.
“Die wind was net te sterk en die vuur het vinnig gehardloop. ’n Mens is magteloos.”
In ’n stadium het ’n derde brand ontstaan.
Boere van sover as Vredefort het soos een man saamgestaan om die vuur te blus.
Kokkie Jansen van Vuuren van die plaas Bloekomdraai was een van die brandbestryders.
Volgens haar het die brande 26 uur lank gewoed.
“Dit het net voor ons plaas gestop,” sê sy.
Steyn sê driftig die departement van paaie moet die skouers van die paaie skoon hou. Weens lang gras langs die pad versprei ’n brand baie vinnig.
“En mense wat ’n vuur begin, moet weet hoe om dit te beheer.”
- Volksblad