Epileptiese aanval laat man glo deur muur ploeg
2012-01-20 12:36
Kaapstad – Die bestuurder van die motor, wat vyf minute voor pouse deur die hek van die J.S. Kloppers Laerskool in Elsiesrivier, Kaapstad geploeg het, het vermoedelik 'n epileptiese aanval gehad terwyl hy bestuur het en toe deur die hek gery, het die eNews-kanaal berig.
Die 44-jarige man is op die toneel dood.
Volgens die man se familie kry hy gereeld dié aanvalle.
'n Ooggetuie het gesê die motor in die straat gejaag en het die bestuurder vermoedelik nie geweet dat daar 'n skerp draai in die pad is nie.
Die motor het toe deur die skoolhek geploeg, oor die skool se veld gery en teen 'n muur tot stilstand gekom.
'n Eenjarige dogtertjie, driejarige seun en nóg 'n agtjarige kind was saam met hom en sy 38-jarige passasier in die motor toe die ongeluk omstreeks 11:00 plaasvind.
Die eenjarige meisie is in 'n kritieke toestand in die Rooikruis-kinderhospitaal en die driejarige seun word in die Tygerberg-hospitaal behandel. Die agtjarige het geen beserings opgedoen nie.
Die 38-jarige passasier, wat in die motor vasgekeer was, word ook in die hospitaal behandel.
Geen skoolkinders of onderwysers is in die ongeluk beseer nie.
Die familie is van die ongeluk in kennis gestel en het na die hospitaal gehaas.
Paula Chowles van dié nuuskanaal is op die toneel en sê leerders en onderwysers by die skool erg getraumatiseer.
– Volg Nuus24 op Twitter
- Nuus24