Elf in hof vir moord op bejaarde paartjie
2012-02-08 19:55
Johannesburg – Elf mans wat daarvan beskuldig word dat hulle ‘n bejaarde paartjie vermoor het, het Woensdag in die Ntuzuma-landdroshof verskyn.
Die bejaarde paartjie is deur die mans daarvan beskuldig dat hulle hul kleinkind vermoor het.
Kapt. Thulani Zwane, woordvoerder van die polisie in KwaZulu-Natal, het gesê die mans sal op 16 Februarie weer in die hof verskyn. Hulle bly in aanhouding.
Hulle word aangekla van moord en brandstigting.
Veertien mense is op 12 Januarie in hegtenis geneem nadat hulle na bewering vir Elsa Dubazana (60) en Rafael Dubazana (66) in Lindelani naby Ntuzuma vermoor het.
“Vier van hulle is vrygelaat nadat hulle deur die polisie ondervra is. Die bewyse teen hulle was nie genoegsaam nie,” het Zwane gesê.
Nog ‘n persoon is op 22 Januarie in Lindelani in hegtenis geneem.
Die polisie het Elsa in haar slaapkamer gevind. Rafael het in die pad buite hul huis gelê.
The Mercury het berig die paartjie is op 6 Januarie aangeval deur ‘n groep mense wat hulle daarvan beskuldig het dat hulle hul 16-jarige kleindogter, Zakude Shozi, doodgemaak het en haar op hul erf begrawe het.
“Hul kleindogter het op 4 Januarie by die Mahatma Gandhi Hospitaal gesterf. Sy het ‘n oordosis pille geneem omdat sy familieprobleme gehad het,” het Zwane gesê.
Hy het gesê die polisie wag op die uitslae van ‘n lykskouing, aangesien daar beweer is dat Shozi deur óf haar ma óf haar pa geslaan is.
- Volg Nuus24 op Twitter
- SAPA