Ekskêrel aangekeer vir Anika-moord
2010-05-18 07:26
Hilda Fourie, Die Burger
Pretoria - Anika Smit se ekskêrel, met wie sy glo drie dae voor haar dood uitgemaak het, is Maandagoggend in verband met die moord op haar in hegtenis geneem.
Nico Venter (21), met wie Anika (17) na bewering ’n maand lank in ’n verhouding was, sal Woensdag in die landdroshof in Pretoria-Noord verskyn.
Venter was die laaste mens met wie Anika op daardie noodlottige Woensdag, sowat twee maande gelede, gepraat het.
Sy het deur die loop van dié dag vir iemand, wat sy glo geken het, die deur van haar ouerhuis in Theresapark in die noorde van Pretoria oopgemaak, waarna sy vermoor en haar hande afgesny is.
Lt.kol. Lungelo Dlamini, provinsiale woordvoerder, het Maandag net bevestig dat ’n 21-jarige man vroegoggend by die Carousel-casino noord van Pretoria in hegtenis geneem is.
Hy wou nie verdere besonderhede bekend maak nie.
Die Burger het verneem Venter was nog in sy bed, glo saam met ’n vriendin van Anika, toe die polisie op hom in sy woonstel by dié casino toegeslaan het.
Venter is betrokke by die sekerheidsdienste van die casino.
Charlotte Eksteen (51), Anika se ma, was gisteroggend byna in trane toe Die Burger haar oor die inhegtenisneming ingelig het.
“Ek het hom (Venter) nooit ontmoet nie, maar Anika het my sowat twee weke voor haar dood gebel en gesê hulle het erg baklei en dat sy klaar is met hom. Sy het nooit gesê waaroor hulle baklei het nie,” het Eksteen gesê.
“Haar (Anika se) pa het vir my gesê dat hy (Venter) by die begrafnis was. Hy het nog in die kerk gesit en huil en haar pa ’n handdruk gegee.
“Ek kan dit nie glo nie. Ek het heeltyd gewonder wie dit aan my kind gedoen het.
“Ek is bitter, bitter dankbaar iemand is gevang.”
Sedert Anika se moord was Eksteen op sterk medikasie en ook in die hospitaal vir behandeling omdat sy nie Anika se dood kon verwerk nie.
Johan Smit (54), wat die dag van sy dogter se moord op haar lyk afgekom het, het gesê Venter het vroeër by sy huis vir haar kom kuier. Volgens hom was hulle nie in ’n verhouding nie. Hy het gesê die inhegtenisneming kan net daartoe lei dat geregtigheid sal geskied, maar dat niks sy dogter sal terugbring nie.
- Die Burger