‘Ekonomiese vryheid ook bedreig'
2010-08-19 08:15
Letitia Watson en Rene Vollgraaff
Volksblad
Pretoria - Die beperking van mediavryheid kan ook ekonomiese vryheid aan bande lê en Suid-Afrika se reputasie as ’n bestemming vir buitelandse beleggings skaad, meen Gareth Ackerman, voorsitter van Pick ’n Pay.
Hy het in ’n verklaring ’n beroep op die Suid-Afrikaanse sake-omgewing gedoen om by die debat oor mediavryheid betrokke te raak gegewe die noue verband tussen ekonomiese en politieke vryheid.
“Ekonomiese vryheid floreer in ’n omgewing waar mense inligting kan ontvang wat nie aan buitensporige regeringsbeheer of regulasies onderwerp word nie, en dis dié vryheid waarvan Suid-Afrikaanse sake-ondernemings afhanklik is.
“Buitelandse beleggers het die versekering nodig dat ons ernstig daaroor is om korrupsie teen te staan, dat die regering se sake deursigtig en verantwoordbaar is en dat inligting beskikbaar en betroubaar is.”
Ackerman reken daarsonder sal Suid-Afrika se reputasie as ’n bestemming vir buitelandse beleggings skade ly.
Daar is volgens hom ’n noue verband tussen politieke vryheid en ’n vrye mark. “Die geskiedenis het oor die wêreld heen bewys lande wat groter ekonomiese vryheid het, is meer welvarend as lande met minder ekonomiese vryheid. Daar is geen lande wat ekonomiese vryheid beperk wat ryk is nie.
“Daarom moet enige poging van die regering om die vrye vloei van inligting teen te staan of mediavryheid te bedreig, teengestaan word.”
Ackerman het bygevoeg dat Suid-Afrika verreweg ’n beter plek is as wat dit voor 1994 was. “Ons is egter steeds ’n gemeenskap wat probleme met ongelykheid, korrupsie en behoeftiges het – dis uitdagings wat oorkom moet word deur dit openlik aan die lig te bring en te debatteer.”
Pick ’n Pay het oor die jare ook konflik met die media gehad, maar dit beteken nie dat die media nie ’n waardevolle rol speel in die monitering van die sakesektor om te verseker dat die regte standaarde en gedrag gehandhaaf word nie, het Ackerman gesê.
“Ons het ook altyd gevind dat die media bereid was om foute reg te stel as ons dit kon bewys.”
Die Suid-Afrikaanse Kamer van Koophandel en Nywerheid het ook Woensdag in ’n verklaring gemaan sekere aspekte van die Wetsontwerp op die Beskerming van Inligting kan daartoe lei dat kommersiële inligting geheim gehou word en dus mededinging (in die sakewêreld) beïnvloed.
- Volksblad