Ek weet niks, sê taxi-man ná ongeluk
2011-11-16 09:06
Kaapstad – “Ek weet nie... ek weet nie... ek weet nie.”
Jacob Humphreys (56), wat agter die stuur was van die minibustaxi waarin tien kinders by ’n spooroorgang in Blackheath gesterf het, het Dinsdag herhaaldelik in die Wes-Kaapse hooggeregshof getuig hy kan nie onthou hoe dit gebeur het nie.
Humphreys ontken skuld op tien aanklagte van moord en vier van poging tot moord ná die ongeluk op 25 Augustus verlede jaar. Hy het oor ’n spooroorgang in Buttskopstraat, Blackheath, gery en die voertuig het voor ’n trein beland. Tien kinders is dood en vier is ernstig beseer.
“Ek weet nie,” het Humphreys geantwoord toe hy gevra is of die vier ooggetuies se weergawes van die ongeluk aan die hof korrek kan wees.
“Ek weet nie,” het hy weer gesê toe daar gevra is hoe sy voertuig voor die trein beland het.
Humphreys het getuig hy het gesien dat die valhekke reeds gesak het. Hy onthou ook dat die ligte by die hekke geflits het.
Hy het hierna ’n u-draai in die rigting van die spooroorgang gemaak, maar onthou daarna niks verder nie. Sy volgende herinnering is hoe hy buite die taxi bygekom het.
Sy regsverteenwoordiger, adv. Johann Engelbrecht SC, het aan hom gevra of hy die kinders se dood begeer het. “Onder geen omstandighede nie,” het Humphreys geantwoord.
In kruisondervraging het adv. Susan Galloway, die staatsaanklaer, dit aan Humphreys gestel dat vier mense aan die hof vertel het hoe sy voertuig by die kruising gekom het. “Hulle sê u het verby stilstaande motors gery, verby die boom en die spoorlyn naaste aan u oorgegaan.”
Humphreys: “Dit is wat hulle sê.”
Galloway: “’n Voertuig kan nie vanself so doelgerig beweeg nie. Hoe ook al die voertuig daar gekom het, dit was ú handeling.”
Humphreys: “Ek weet nie.”
Regter Robert Henney het dit aan Humphreys gestel dat die voertuig volgens objektiewe feite voor die trein ingery het. “Kan u dit aanvaar?” wou hy weet.
Humphreys: “Ek kan dit nie aanvaar nie. Ek weet niks nie.”
Galloway: “U was ’n bietjie laat daardie oggend. U was ongeduldig. U wou nie daardie een minuut wag tot dit veilig is nie. U wou daardie kans vat. ’n Kans waarby u die meeste verloor het toe tien kinders hul lewe verloor het.”
Humphreys: “Ek het verduidelik dat ek nie kan onthou nie.”
Die verhoor duur voort.
– Volg Nuus24 op Twitter
- Die Burger