'Ek het gevlug weens doodsdreigement' – Moyo
2012-01-24 23:08
Pretoria – Die misdadiger Bongani Moyo het Dinsdag in die Pretoria-streekhof gesê hy het uit aanhouding ontsnap omdat ‘n polisiebeampte gedreig het om hom dood te maak.
“Ek is onskuldig. Die polisiebeampte het gesê hy gaan my doodmaak as ek nie saam met hom uitgaan en ‘n paar mense uitwys nie. Toe hy weer die hofsaal binnegegaan het, het ek opgestaan en geloop.”
Moyo het aan die hof gesê hy was bang die polisiebeampte sou die daad uitvoer.
“Ek het nie die mense geken wat hy wou gehad het ek moes uitwys nie en het nie geweet wat om te doen nie. My medebeskuldigdes [in die reeks rooftogte waarvan hy beskuldig word] het selfs vir my gesê ek gaan doodgemaak word. Die polisiebeampte het hulle vroeër vertel,” het Moyo gesê.
Die saak is tot 3 Februarie uitgestel.
Die hof het Dinsdag verdaag sodat Moyo kans kan hê om dokumente te lees van verrigtinge in ‘n hofverskyning wat hy op 10 Augustus 2011 gemaak het.
Hy het verskyn op aanklag van roof. Dit was die dag waarop hy op krukke uit die hof ontsnap het.
Moyo is deur die hof gesê hy kan van die inligting in dié dokumente gebruik as deel van sy verdediging, sou hy wou. Ná die verdaging het hy gesê hy het die dokumente gelees, maar hulle nie verstaan nie. Die hof het toe weer verdaag.
Die dokumente is aan Moyo gegee aangesien hy geen regsverteenwoordiging gehad het nie. In September 2011 het hy aan die hof gesê hy sal homself verdedig teen die aanklag dat hy uit aanhouding ontsnap het. Hy het ook nie om borgtog aansoek gedoen nie.
‘n Regsverteenwoordiger van die regshulpraad is Dinsdag aangewys om Moyo te verteenwoordig.
Moyo, wat in handboeie en voetboeie was, is deur verskeie polisiebeamptes by die hof in vergesel.
- Volg Nuus24 op Twitter
- SAPA