‘Ek het Brett Kebble net vir die geld doodgeskiet’
2010-07-28 07:51
Johannesburg. - Hy was woedend toe hy agterkom Glenn Agliotti weet hy is betrokke by die plan om Brett Kebble te vermoor, het Nigel McGurk, een van Kebble se selferkende moordenaars, in die hof getuig.
“Agliotti is die laaste mens wat ek wou hê moes weet waarby ek betrokke is. Hy praat te veel. Hy noem ons altyd sy boysen dit irriteer my.”
Agliotti staan in die Suid-Gautengse hooggeregshof tereg op aanklagte van moord op Kebble, asook poging tot moord en sameswering tot moord.
“Ons het in daardie stadium al ’n reputasie gehad dat ons die muscle-manne is en mense intimideer. Ek het gevoel Agliotti het op ons rûe gery deur ons name te gebruik. Ek het nie van Agliotti gehou nie.”
McGurk het getuig hy het op 22 September 2005 – die eerste dag waarop hulle Kebble sou vermoor – ’n oproep van Kebble gemis. Hy het teruggebel en Kebble het gesê: “Call the boys off.”
“Vir my het dit beteken ons moenie voortgaan met die planne om Kebble dié aand te skiet nie.
“Ek was woedend dat Agliotti ook van die beplande moord geweet het. Ek het dit die volgende dag vir (Clinton) Nassif gesê, en hy het gesê Agliotti is vriende met Kebble en hy is belangrik omdat hy die geld vir die job sou kry.”
Nassif het glo die opdrag vir die moord op Kebble gegee.
“Ons sou elkeen R500 000 kry. Volgens Nassif het Agliotti nog nie die geld gekry nie en daarom het hulle die planne die vorige dag gestop. “Ek het dit (om Kebble te skiet) vir die geld gedoen.”
McGurk het getuig hoe die pistool twee keer geweier het toe hulle Kebble moes skiet. Hy het vir Mikey Schultz gesê hy moet dit nie vir Nassif vertel nie, want dit lyk darem nie baie professioneel nie. Volgens McGurk het hy sy opdragte van Schultz gekry. Hy het by Schultz gekla hy wil sy geld hê, want ná die moord het hy net R30 000 gekry.
“Mikey (Schultz) het my sowat drie maande later gebel en gesê ek moet na die ontkleeklub The Grand kom. Hy het gesê Agliotti is ook daar en wil met my praat.
“Agliotti het alleen by die soesji-kroeg gesit. Ek het gesê ek wil my geld vir die job hê. Hy het gesê hy het alles aan Clint (Nassif) betaal.”
Volgens McGurk is hy “uiteindelik vir my werk betaal” toe hy ’n tjek vir R300 000 gekry het.
“Later is Clint gevang. Hy het toe alles uitgelap, en dis hoekom ek hier is.”
- Die Burger