Egpaar van Bethulie in hul bed vermoor

2013-02-11 09:15

Bethulie – ’n Vooraanstaande egpaar wat ’n leiersrol in die Christelike gemeenskap aan die buitewyke van Bethulie gespreel het, is in hul huis vermoor, berig Volksblad.

Dit is die derde dubbele moord op ’n bejaarde egpaar binne maande wat die Vrystaat geruk het. 

Gordon (78) en Lorraine Adam (63) is Saterdagoggend omstreeks 11:00 deur hul seun, Ashley, dood gekry waar hulle klaarblyklik niksvermoedend in hul bed oorval is.

Gordon is vermoedelik herhaaldelik met ’n mes in die bors en rug gesteek. Lorraine het vermoedelik ná ’n enkele hou met ’n panga oor die kop gesterf.

Die egpaar se Toyota-bakkie, vuurwapens (’n .22-rewolwer en ’n pistool) en Lorraine se selfoon asook al hul sleutels is geroof. ’n Skootrekenaar en Lorraine se handsak is egter onaangeraak in die sitkamer agtergelaat.

“Ek glo die hele aanval was baie fyn beplan en professioneel uitgevoer. Ek dink nie my ouers het eens besef wat gebeur nie," het Ashley gesê.

– Volg Nuus24 op Twitter