Egpaar spring aanval vry
2011-02-24 07:00
Bloemfontein - ’n Bloemfonteinse man en sy vrou sou waarskynlik nog slagoffers in die misdaadgeteisterde Bloemspruit geword het as hy nie buite ’n ander paadjie as gewoonlik gevolg en sodoende ’n aanvaller gewapen met ’n panga gesystap het nie.
Die Bloemspruit-buurtwag het die egpaar onmiddellik te hulp gesnel, maar die Bloemspruit-polisie het eers meer as twee uur later opgedaag, sê die egpaar.
Meisie Niemann (62) vertel sy en haar man, Faan (64), het Maandagaand 7de Laan op televisie gekyk toe hul hond buite begin blaf.
Toe haar man by die huis uitstap, het ’n man met ’n panga in sy hand om die draai gekom.
“Voetspore het later gewys daar was nog ’n vermeende aanvaller op die toneel.
“As my man soos gewoonlik buite muurlangs gestap het, sou hy beslis gekap of gesteek gewees het. Hy het gelukkig weg van die muur gestap en toe die wagtende aanvaller om die draai gesien.
“My man het daarna agteruit gespring en probeer hardloop na die afdak om ’n plank te gryp. Toe hy weer sien, was die man weg.”
Mev. Niemann het intussen besef daar is fout en het haar buurman, ’n polisiebeampte en buurtwaglid, gebel. Hy het dadelik na hul huis gejaag en was al omstreeks 19:00 daar.
Daarvandaan het hy Bloemspruit se polisiekantoor gebel. Die polisie het eers teen 21:30 opgedaag.
Ander buurtwaglede het dadelik gereageer en blitsig opgedaag.
Die buurtwag het eergister twee rye voetspore buite die huis gekry. Hulle patrolleer ook nou meer gereeld hier. Mev. Niemann sê geen verdagtes is nog deur die polisie in hegtenis geneem nie.
Sy vertel dis ironies dat sy kort voor die bejaarde mnr. Ben Steyn van Bloemspruit se moord einde verlede jaar, hom gewaarsku het om versigtig te wees. Sy vrou is enkele maande voor sy moord oorlede en hy het alleen gebly.
“My senuwees is nou klaar. Ek sit nou die deur met valkoë en dophou. Maar ek besef as jy moet doodgaan, sal jy doodgaan, of jy nou trek, of nie trek nie,” het mev. Niemann gesê.
Frans Croucamp, wat in beheer van die Bloemspruit-buurtwag se patrollies is, sê die buurtwag het al vele suksesse behaal.
Ook in dié geval kon hulle vinnig die egpaar te hulp snel.
Hy sê vandat hulle in November met die buurtwag in Bloemspruit begin het, het hulle al verskeie mense se vee ook weer help terugkry.
Hul ledetal groei steeds. Croucamp sê nie net is ’n buurtwag vandag noodsaaklik nie, dit is ook belangrik vir buurtwagte om nou met die polisie saam te werk om sodoende misdaad te bekamp.
Volksblad het ook in Desember berig oor Hennie Viljoen (51) van Bloemspruit wat wreed met skerp voorwerpe gesteek en met klippe doodgeslaan is.
- Volksblad