Egpaar op hoofweg oorval
2012-02-23 11:00
Johannesburg – ‘n Egpaar van Randfontein is op die Johannesburgse Goue Hoofweg oorval, het ‘n koerant berig.
Pierre en Marietjie le Clus was Woensdag besig om na Mosambiek te reis, maar moes stilhou om ‘n band om te ruil, het Beeld berig.
Een van hul bande is deur groot klippe beskadig wat die pad versper het.
Twee mans het mnr. Le Clus oorval toe hy uit die voertuig geklim het om die band om te ruil.
Volgens die berig het die mans hom met ‘n klip en sy eie wielsleutel oor die kop geslaan.
Sy vrou het haarself in die motor toegesluit en die polisie gebel.
Die aanvallers het op die vlug geslaan toe ‘n sekuriteitsvoertuig stilgehou het om ondersoek in te stel.
Mnr. Le Clus is na ‘n hospitaal geneem waar hy steke in sy kop gekry het. Hy is later ontslaan.
Volg Nuus24 op Twitter
- SAPA