Egoli sê totsiens
2009-08-29 21:53
Thinus Ferreira
Kaapstad – Die einde van ’n Suid-Afrikaanse tv-era het gister aangebreek toe die heel laaste toneel van "Egoli" enkele minute ná 17:00 by Sasani Studios in Johannesburg verfilm is. Die trane het vryelik gevloei.
Daar sal nog tot einde Maart episodes van Suid-Afrika se langste aaneenlopende plaaslike sepie op M-Net uitgesaai word, maar gister is die laaste episode met groot emosie opgeneem. Die hele produksiespan en akteurs het almal vir die laaste emosionele oomblik by ateljee vyf saamgedrom om die einde van "Egoli" te vier.
Bobby Heaney, wat die regisseur van "Egoli" se heel eerste episode byna 18 jaar gelede was, was ook regisseur van die laaste episodes.
Franz Marx, die reeks se skepper, was nie gister vir kommentaar beskikbaar nie, maar “groot emosie het met die laaste toneel in die lug gehang’’, het iemand wat vir die laaste toneel op stel was gisteraand aan Die Burger vertel.
“Uit die aard van die saak was dit ’n baie geskiedkundige dag – vir die akteurs, vir die produksiemense, vir almal wat ’n leeftyd saam deurgebring het. Die spelers het hul laaste toneel gedoen en dit was ’n groot oomblik met styl en grasie.”
’n Groot klomp akteurs het gister hul laaste toneel verfilm, onder wie veteraanspelers soos Hennie Smit (Bertie).
Die meeste van die akteurs sien daarna uit om net vakansie hou.
Nou sal die stelle afgebreek word, behalwe dit wat dalk volgende jaar vir die "Egoli"-rolprent nodig sal wees.
Helen Smit, M-Net se hoof vir plaaslike inhoud, het gister aan Die Burger gesê M-Net is trots op wat "Egoli" bereik het.
“Dit was ’n baanbreker op die gebied van plaaslike sepies. Dit was die eerste daaglikse een vir Suid-Afrika. Dit het absoluut ’n standaard gestel van wat verwag word van ’n daaglikse storie,” het sy gesê. “Elke liewe mens by 'Egoli' kan trots wees op die TV-produksie en die nalatenskap vir die ganse plaaslike TV-bedryf wat die reeks gelaat het.’’
- Die Burger