Eeufees 'reuse-sukses ondanks probleme'
2012-01-11 08:01
Bloemfontein – ANC het Dinsdag op ’n nuuskonferensie hier erken daar was “baie ernstige probleme” tydens sy eeufees in Bloemfontein, maar dat die fees desondanks ’n reuse-sukses was.
Jackson Mthembu, ANC-segsman, het ook uitgewei op pres. Jacob Zuma se stelling in sy toespraak Sondag dat die interne verkiesingsproses van die ANC hersien gaan word.
“Ons wil seker maak dat almal wat op die provinsiale en nasionale leierskapsverkiesingskonferensies stem, behoorlik daartoe gemagtig is.”
Hy het gesê hulle wil seker maak afgevaardigdes op dié konferensies is wel amptelike lede van die ANC.
Mthembu het ook aangekondig wat met die 52 beeste gaan gebeur wat aan die party geskenk is vir die eeufees.
“Ons gaan vir elk van die nege provinsies vyf beeste gee wanneer dit die provinsies se eeufees-maande is, om te slag en vir armes te gee.”
Die Wes-Kaap is Februarie aan die beurt en sal dan sy vyf beeste ontvang.
Sibongile Besani, Vrystaatse ANC-sekretaris, het gesê die Vrystaat se beeste is reeds geslag, maar hy kon nie sê waar en vir wie die vleis gegee is nie.
Besani het ook bevestig dat daar 7 000 verjaardagkoeke versprei gaan word, maar kon ook nie sê waar, wanneer en aan wie nie.
Mthembu het gesê die oorblywende sewe beeste sal in Desember geslag word en afgevaardigdes na die leierskapskonferensie in Bloemfontein sal die vleis eet.
Hy het weer gesê daar is geen staatsgeld gebruik om die fees aan te bied nie en gesê onder meer Cell C, MTN, Vodacom en Patrice Motsepe, die rykste man in Suid-Afrika, het geld vir die geleentheid geskenk.
Mthembu het gesê die ANC bedank “om bekende redes” nie graag die media nie, maar moet oor die eeufeesdekking ’n uitsondering maak.
“Veral die SAUK het ons boodskappe en reëlings deurgegee aan die publiek.”
Volg Nuus24 op Twitter
- Volksblad