Een dood, een beseer ná voertuig rol
2010-08-30 02:40
Johannesburg – Een man is dood en ‘n ander een beseer nadat hul motor op ‘n Kaapstadse snelweg gerol het, het paramedici gesê.
Volgens Vanessa Jackson, ER24-woordvoerder, het die bestuurder beheer oor die motor verloor nadat die motor meganiese probleme gegee het.
Die ongeluk het Sondag op die N7 voor die Atlantis-afrit plaasgevind.
“Die bestuurder is uit die voertuig geruk toe dit rol en hy het aan talle kritieke beserings gely,” het sy gesê.
Twee dokters wat toevallig verbygery het, het gestop om die mans te probeer help.
Toe paramedici by die toneel opdaag, is die bestuurder dood verklaar.
Die passasier is op die toneel vir matige rug- en nekbeserings, skraapmerke en kneusplekke behandel.
Volg Nuus24 op Twitter.
- SAPA