ET se vrou het gedreig om te skei
2012-01-31 14:15
Johannesburg – Martie Terre’Blanche het haar man glo gedreig om van hom te skei, is Dinsdag in die hooggeregshof in Ventersdorp in die Noordwes gehoor.
Adv. Norman Arendse het Martie, die vrou van die vermoorde AWB-leier Eugene Terre’Blanche, gevra of dit waar is dat sy en haar man nie saam gewoon het nie.
Sy het dit ontken en gesê hy het op die plaas gebly wanneer daar werk was om te doen of wanneer daar niemand was om na die beeste om te sien nie.
Op die vraag oor of sy ‘n egskeiding oorweeg het, het Martie gesê: “Ek het hom eendag (met 'n egskeiding) gedreig en hy het vir my gesê sy hele lewe sal uitmekaar val. Ek sou nooit van hom skei nie.”
Sy het dié dreigement in 2010 gemaak, want sy het nie daarvan gehou wanneer hy gedrink het nie.
‘n Plaaswerker, Chris Mahlangu, en ‘n jeugdige word daarvan beskuldig dat hulle die voormalige AWB-leier in April 2010 in sy plaashuis in Noordwes vermoor het.
Albei het onskuldig gepleit op aanklagte van moord, huisbraak en roof met verswarende omstandighede.
Mahlangu beweer dat hy in selfverdediging opgetree het. Die tiener ontken betrokkenheid in die voorval.
– Volg Nuus24 op Twitter
- SAPA