ET-moord: 'My broer is fyngekap'
2010-04-05 10:31
Linda de Beer, Die Burger
Ventersdorp - ‘My broer se gesig is fyngekap. Dit was ’n wrede moord.”
Dit was Sondag die woorde van Eugène Terre’Blanche se enigste broer, Andries, aan tientalle emosionele boere en lede van die AWB by die ingang na Terre’Blanche se plaas buite dié dorp.
Hy het boere gevra om Dinsdag in hul massas na die Ventersdorpse landdroshof op te ruk vir die verskyning van sy broer se twee vermeende moordenaars, wat glo vir hom gewerk het.
Die haatspraak teen boere deur Julius Malema, ANC-jeugleier, hou volgens Terre’Blanche se familie, boere en AWB-lede direk verband met die wrede aanval op hom.
Terwyl die familie mense gemaan het om kalm te bly, het mnr. André Visagie, sekretaris-generaal van die AWB, prontuit verklaar dié organisasie gaan sy leier se dood wreek.
“Die AWB het besluit hy het geen keuse as om homself te bewapen en ons leier se dood te wreek nie,” het Visagie gesê. Tog het hy lede gemaan om vir eers “rustig” te bly sodat Terre’Blanche “in vrede” begrawe kan word.
“Ons kán dit doen. Ons sal julle wys.”
Dís wat AWB-ondersteuners en ander wittes hier gister gemeen het mnr. Eugène Terre’Blanche se moordenaars wou bewys deur glo ’n kapmes op hul slagoffer se bors te los en self die polisie daaroor te bel . Hulle glo daar is ’n direkte verband tussen die moord op Terre’Blanche en die ANC-jeugleier Julius Malema se herhaalde “skiet die boer”-uitspraak.
“Hulle (die moordenaars) was uittartend, maar ek hoop die moord sal die Afrikanervolk laat opstaan vir hul volk en kultuur,” het Marlene Hanekom voor Terre’Blanche se huis op Ventersdorp gesê.
Sy en haar man, Pieter, is lede van die Brandwag van die Christen Boerevolk, volgens hulle ’n nie-militante regse groep wat Afrikaners se kultuurgoedere wil behou.
Nathi Mthethwa, minister van polisie, het geweier om hom oor ’n “politieke saak” uit te laat toe hy herhaaldelik gevra is oor Malema se uitsprake en of die regering enigsins optrede teen hom beplan.
“Kom ons bly kalm en laat die polisie toe om by die kern van die saak uit te kom. Ek gaan nie by ’n politieke bespreking ingetrek word nie. Eugène Terre’Blanche is vermoor. Die polisie ondersoek hoekom dit gebeur het,” het Mthethwa op ’n nuuskonferensie in die raadsaal van die Ventersdorpse munisipaliteit gesê.
Mthethwa en genl. Bheki Cele, nasionale polisiehoof, het Terre’Blanche se weduwee Martie by die egpaar se dorpshuis besoek voordat hy boere en ander familielede op die plaas te woord gestaan het.
Die media is nie toegelaat om die plaas te betree nie. Forensiese deskundiges was Sondagmiddag laat nog op die toneel besig.
Twee plaaslike polisielede het Saterdagmiddag laat op Terre’Blanche se verminkte lyk op sy bed in die opstal van sy plaas afgekom. Dit was nadat die polisie ’n oproep oor ’n beweerde aanranding op die plaas gekry het.
’n Kapmes en ’n knopkierie is by die lyk gekry. Alle aanduidings is dat hy geslaap het toe hy aangeval is, het kapt. Adéle Rautenbach, polisiewoordvoerder in Noordwes, gesê.
In ’n ander vertrek het ’n kapstok omgeval gelê, terwyl dit ook gelyk het asof daar met Terre’Blanche se wit Corsa-bakkie gepeuter is.
’n Venster van die huis was gebreek, maar die polisie het ook toegang tot die huis gekry deur ’n deur wat nie gesluit was nie.
Die twee verdagtes, van onderskeidelik 15 en 28 jaar oud, is kort ná die moord aangekeer waar hulle langs ’n grondpad in die distrik geloop het. Terre’Blanche se selfoon is glo in hul besit gekry.
Die boeregemeenskap het inligting verwerp dat ’n loongeskil die motief vir die moord was. Daar was glo ’n woordewisseling tussen Terre’Blanche en die verdagtes oor uitstaande betaling.
“Hoe onderhandel jy met iemand as hy vas aan die slaap in sy bed is? Klim jy deur ’n venster om met iemand te onderhandel?” het ene Sean, ’n plaaslike boer, woedend gesê nadat Mthethwa met hulle gepraat het.
- Die Burger