‘ET betaal my nie; wurg my'
2010-04-15 06:16
Susan Cilliers, Beeld
Ventersdorp. – Hy het Eugène Terre’Blanche, AWB-leier, uit selfverdediging doodgemaak omdat dié hom aangerand en by geleentheid gewurg het.
Só gaan Chris Mahlangu (27), wat saam met ’n 15-jarige seun van die moord op Terre’Blanche beskuldig word, in die hof aanvoer.
Puna Moroko, Mahlangu se prokureur, het gister buite die Ventersdorpse landdroshof gesê al is Terre’Blanche se lyk met ’n afgetrekte broek gevind, is Mahlangu se verweer beslis nie dat seksuele dade soos sodomie plaasgevind het nie.
“Mahlangu sê Terre’Blanche het dikwels wanneer hy gedrink het, gaan lê en slaap en dan sy broek afgetrek omdat hy warm gekry het.”
Volgens Moroko is Mahlangu se verweer dat dit maand ná maand ’n gesukkel was om sy salaris van R600 uit Terre’Blanche te kry.
Terre’Blanche het glo gereeld, ook die dag toe hy vermoor is, baie drank en sigarette vir sy werkers gekoop en dan gesê hulle kry nie geld nie omdat dít hul betaling is.
Hy het Mahlangu glo ook met Kersfees verlede jaar R100 gegee en wou dit toe later van sy salaris aftrek.
Terre’Blanche het volgens Moroko op die dag van sy dood vir Mahlangu 18 bottels Savanna gekoop, 13 vir die seun, en sigarette vir albei.
Moroko het gesê daar was ’n aanrandingsvoorval wat tot Terre’Blanche se dood gelei het.
Die hof sal ook hoor Terre’Blanche het Mahlangu sowat twee maande voor dit gewurg, maar dat Mahlangu weer by hom gaan werk het omdat hy die geld nodig gehad het.
“Hy en Terre’Blanche het ’n slegte verhouding gehad, maar hy het nooit ’n aanrandingsklag ingedien nie,” het Moroko gister gesê.
“Almal was bang vir Eugène, selfs die wittes.”
Volgens Moroko is Mahlangu “oukei”. “Jy sal dink niks het gebeur nie.”
Mahlangu se borgtogaansoek is tot 10 Mei uitgestel om sekerheid oor sy woonadres te kry.
Die klein, skraal man het grootoog na die talle joernaliste en familielede van Terre’Blanche in die volgepakte hofsaal gekyk.
Die seun wat saam met hom op Terre’Blanche se plaas Witrantjiesfontein as ’n beeswagter gewerk het, het gister besluit om nie ’n borgtogaansoek te bring nie.
Hy word in ’n plek van veiligheid aangehou waar hy volgens sy prokureur, mnr. Zola Majavu, nou vir die eerste keer in sy lewe op ’n bed slaap en drie etes per dag kry.
“Ons het in oorleg met sy ouers en maatskaplike werkers besluit om nie voort te gaan met die borgtogaansoek nie omdat my kliënt gemaklik is. Sy omstandighede is nou beter as by sy huis en hy het intussen weer begin skoolgaan.”
Majavu het gesê dis ook veiliger vir sy kliënt om in aanhouding te bly. “Hy is sielkundig sterk.”
-Beeld